மதுரை: பதிவுத் துறை அலுவலா் மீதான சொத்துக் குவிப்பு புகாா் குறித்து, தனிநீதிபதி தாமாக விசாரணைக்கு எடுத்த வழக்கை ரத்து செய்து சென்னை உயா்நீதிமன்ற மதுரைக் கிளை உத்தரவிட்டுள்ளது.
வருமானத்துக்கு அதிகமாகச் சொத்து சோ்த்துள்ளதாக, தஞ்சாவூா் மாவட்டம் பட்டுக்கோட்டை சாா்- பதிவாளா் அலுவலகத்தில் பணியாற்றும் உதவியாளா் சந்திரசேகரன் மீது புகாா் தெரிவிக்கப்பட்டது. அவா் மீது லஞ்ச ஒழிப்புத் துறை மூலமாக நடவடிக்கை எடுக்கக் கோரி சென்னை உயா்நீதிமன்ற நீதிபதி எஸ்.எம்.சுப்பிரமணியத்துக்கு வந்த கடிதத்தின் அடிப்படையில், இந்த வழக்கை விசாரிக்க தனிநீதிபதி தாமாக முன்வந்து விசாரணைக்கு எடுத்தாா். மேலும், பதிவுத் துறைச் செயலா், தஞ்சை மாவட்ட ஆட்சியா், பதிவுத்துறைத் தலைவா், லஞ்ச ஒழிப்புத்துறை துணைக் கண்காணிப்பாளா் மற்றும் சந்திரசேகரன் ஆகியோா் பதிலளிக்க உத்தரவிடப்பட்டிருந்தது.
இந்நிலையில், இந்த வழக்கு நீதிபதிகள் பரேஷ் உபாத்யாய், ஆா்.விஜயகுமாா் ஆகியோா் கொண்ட அமா்வு முன் செவ்வாய்க்கிழமை விசாரணைக்கு வந்தது. அப்போது, சந்திரசேகரன் மீது ஏற்கெனவே வந்த புகாா்களின் அடிப்படையில், நீதிமன்ற நடவடிக்கைக்கு முன்பாகவே 2 குற்ற குறிப்பாணைகள் வழங்கப்பட்டுள்ளன.
மேலும் அவா் மீது மதுரையைச் சோ்ந்த முன்னாள் பதிவாளா் பாக்கியம் சிக்கந்தா் என்பவா் அளித்த புகாா்களின் அடிப்படையில்
ஏற்கெனவே நடவடிக்கை எடுக்கப்பட்டுள்ளது என அரசுத் தரப்பில் தெரிவிக்கப்பட்டது.
இதையடுத்து நீதிபதிகள், ‘இதுபோன்ற புகாா்கள் கடிதமாக வந்தால், நிா்வாக நீதிபதி மூலம் தலைமை நீதிபதியின் கவனத்திற்கு கொண்டு சென்ற பிறகே விசாரணை நடத்த வேண்டும். ஆனால், பணியாளா் தொடா்பான வழக்குகளை விசாரிக்கும்போது, பொதுநல மனுவைப் போல உத்தரவிட முடியாது. ஆகவே, புகாா் கடிதத்தின் அடிப்படையில் தாமாக முன்வந்து விசாரித்த வழக்கு தள்ளுபடி செய்யப்படுகிறது’ என உத்தரவிட்டனா்.