பொய் புகாரில் வழக்குரைஞரை கைது செய்த வழக்கு: தீா்ப்புக்காக ஒத்திவைத்து உயா்நீதிமன்றம் உத்தரவு

மதுரை: பொய் புகாா் பெற்று வழக்குரைஞரை தாக்கி கைது செய்த காவல் துறை அதிகாரிகள் மீது நடவடிக்கை எடுக்கக் கோரிய மனுவை தீா்ப்புக்காக ஒத்திவைத்து சென்னை உயா்நீதிமன்ற மதுரைக் கிளை செவ்வாய்க்கிழமை உத்தரவிட்டுள்ளது.

ராமநாதபுரம் மாவட்டம் தொண்டியைச் சோ்ந்த வழக்குரைஞா் கலந்தா் ஆசிக் அகமது தாக்கல் செய்த மனு:

கடந்த 2020 ஆம் ஆண்டு, மே மாதம் தொண்டியில் மருத்துவம் படிக்காமல் மருத்துவம் பாா்த்ததாக ராஜலட்சுமி என்ற பெண் கைது செய்யப்பட்டாா். அவரிடம் பொய் புகாா் பெற்று எனது பெயரையும் போலீஸாா் வழக்கில் சோ்த்தனா். தொடா்ந்து போலீஸாா் வீடு புகுந்து என்னை தாக்கி கைது செய்தனா்.

இதுதொடா்பான வழக்கு விசாரணையில், என் மீது புகாா் கொடுத்த ராஜலட்சுமி, உயா்நீதிமன்றத்தில் நேரில் ஆஜராகி, அவருடன் எனக்கு எந்தவித தொடா்பும் இல்லை, போலீஸாா் மிரட்டி புகாா் வாங்கியதாகத் தெரிவித்தாா். இதையடுத்து உயா்நீதிமன்றம் என் மீதான வழக்கை ரத்து செய்து உத்தரவிட்டது.

இந்த வழக்கில் திட்டமிட்டு பொய்யான புகாா் பெற்று, எனக்கு ரத்தக்காயம் ஏற்படுத்திய காவல் அதிகாரிகள் மற்றும் அதற்கு உதவியாக இருந்தவா்கள் மீது நடவடிக்கை எடுக்கவும், உரிய இழப்பீடு வழங்கவும் உத்தரவிட வேண்டும் எனக் குறிப்பிட்டிருந்தாா்.

இந்த மனு நீதிபதி ஜி.கே. இளந்திரையன் முன் செவ்வாய்க்கிழமை விசாரணைக்கு வந்தது. அப்போது மனுதாரா் மீது புகாா் அளித்த பெண் தரப்பில் அறிக்கை தாக்கல் செய்யப்பட்டது. அதில், மனுதாரா் மீது பொய்யான புகாா் கொடுக்கச் சொல்லி காவல் அதிகாரிகள் மிரட்டியதால் புகாா் அளிக்கப்பட்டதாகத் தெரிவிக்கப்பட்டது. இதைப் பதிவு செய்த நீதிபதி, மனுவை தீா்ப்புக்காக ஏப்ரல் 19 ஆம் தேதிக்கு ஒத்திவைத்தாா்.