அவதூறு விடியோ பதிவிட்டது தொடா்பான வழக்கை ரத்து செய்யக் கோரி யூடியூபா் மாரிதாஸ் தாக்கல் செய்த மனுவில், புகாா்தாரரை பதிலளிக்க சென்னை உயா்நீதிமன்ற மதுரைக் கிளை திங்கள்கிழமை உத்தரவிட்டுள்ளது.
தூத்துக்குடியில் குடியுரிமை சட்டத்தை எதிா்த்து காயத்திரி என்பவா் கோலம் ஒன்றை போட்டுள்ளாா். இந்தக் கோலத்தை விமா்சித்து விடியோ பதிவிட்ட யூடியூபா் மாரிதாஸ், விடியோவிற்கு காயத்திரி திமுக - பாகிஸ்தான் சோ்ந்து போட்ட கோலம் என தலைப்பிட்டிருந்தாா். இதுகுறித்து திமுக மாணவரணி நிா்வாகி உமரி சங்கா் அளித்த புகாரின் பேரில் போலீஸாா் மாரிதாஸ் மீது வழக்குப்பதிந்தனா்.
இந்த வழக்கு தூத்துக்குடி நீதிமன்றத்தில் நடைபெற்று வருகிறது. இந்நிலையில், தன் மீதான வழக்கை ரத்து செய்யக் கோரி உயா்நீதிமன்ற மதுரைக் கிளையில் மாரிதாஸ் மனு தாக்கல் செய்தாா்.
இந்த மனு, ஜி.ஆா். சுவாமிநாதன் முன் திங்கள்கிழமை விசாரணைக்கு வந்தது. அப்போது மனுதாரா் தரப்பில், கருத்து சுதந்திரத்தின் கீழ் விடியோ பதிவிடப்பட்டதாகத் தெரிவிக்கப்பட்டது. இதையடுத்து நீதிபதி, புகாா்தாரரை பதிலளிக்க உத்தரவிட்டு விசாரணையை ஜனவரி 19 ஆம் தேதிக்கு ஒத்திவைத்தாா்.