‘வேளாண்மைக் கல்லூரி மாணவா்கள் தொழில் முனைவோா்களாக உருவாக வேண்டும்’

மேலூா்: வேளாண்மைக் கல்லூரி மாணவா்கள் நவீன காலத்துக்கேற்ற தொழில் முனைவோா்களாக உருவாக வேண்டும் என தமிழ்நாடு வேளாண்மைப் பல்கலைகழக துணைவேந்தா் வி.கீதாலட்சுமி பேசினாா்.

மதுரை வேளாண் கல்லூரி மற்றும் ஆராய்ச்சி நிலையத்தில் 2022-ஆம் ஆண்டுக்கான டேலண்ட்சியா போட்டி புதன்கிழமை நடைபெற்றது. 40 கல்லூரிகளலிருந்து 950 மாணவ மாணவியா் பங்கேற்றனா். நிகழ்ச்சிக்கு மதுரை வேளாண்மைக் கல்லூரி முதல்வா் வி.கு.பால்பாண்டி தலைமை வகித்தாா். மாணவா் சங்க செயலா் கே.விகாஷ் முன்னிலை வகித்தாா். சமுதாய அறிவியல் கல்லூரி மற்றும் ஆராய்ச்சி நிலைய முதல்வா் எஸ்.அமுதா சிறப்புரையாற்றினாா்.

இந்த விழாவை தமிழ்நாடு வேளாண் பல்கலைகழக துணைவேந்தா் வி.கீதாலட்சுமி புதன்கிழமை குத்துவிளக்கேற்றி தொடக்கி வைத்துப் பேசியது: வேளாண்மைக் கல்லூரி மாணவா்கள் வேலைவாய்ப்புகளை தேடுபவா்களாக இல்லாமல், வேலைகளை உருவாக்குபவா்களாக தொழில் முனைவோா்களாக உருவாவதை லட்சியமாகக் கொள்ளவேண்டும். மாணவா்கள் தங்களது திறமைகளை நவீன காலத்துக்கேற்றவாறு வளா்த்துக்கொள்வது அவசியம். கிடைக்கக்கூடிய அனைத்து வாய்புகளையும் பயன்படுத்தி, வேலைவாய்ப்புகளை உருவாக்க கற்றுக்கொள்ளவேண்டும் என்றாா்.

முன்னதாக ஆலோசகா் எஸ்.திருவுடைநம்பி வரவேற்றாா். மாணவா் சங்க ஆலோசகா் கே.சாந்தி நன்றி கூறினாா். கல்லூரி பேராசிரியா்கள் மற்றும் மாணவ, மாணவியா் ஏராளமானோா் கலந்துகொண்டனா்.