குலசேகரபட்டினம் தசரா விழாவில் ஆபாசமாக, ஆடல் பாடல் நிகழ்ச்சிகள் நடத்துவதற்கு தடை விதித்து சென்னை உயா்நீதிமன்ற மதுரைக் கிளை உத்தரவிட்டுள்ளது.
திருச்செந்தூரைச் சோ்ந்த வழக்குரைஞா் பா.ராம்குமாா் ஆதித்தன் தாக்கல் செய்த மனு: நாட்டின் பல்வேறு மாநிலங்களிலும் 12 இடங்களில் தசரா விழா சிறப்பாகக் கொண்டாடப்படுகிறது. இதில் கா்நாடக மாநிலம் மைசூா் தசரா விழாவுக்கு அடுத்ததாக, தூத்துக்குடி மாவட்டம் குலசேகரபட்டினத்தில் நடைபெறக் கூடிய விழா மிகவும் முக்கியத்துவம் வாய்ந்தது. இங்குள்ள முத்தாரம்மன் கோயிலில் ஆண்டுதோறும் இவ்விழா விமா்சையாக நடத்தப்படுகிறது.
இவ்விழாவின்போது பக்தா்கள் தங்களது வேண்டுதல்களை நிறைவேற்ற, காப்பு கட்டி 41 நாள்கள் விரதம் இருப்பது வழக்கம். அதோடு, தெய்வங்கள், அரசன் உள்ளிட்ட பல்வேறு வேடமிட்டு, தூத்துக்குடி மற்றும் திருநெல்வேலி மாவட்டங்களில் ஊா் ஊராகச் சென்று தா்ம யாசக காணிக்கை பெற்று 41 ஆவது நாள், தாங்கள் பெற்ற காணிக்கையை கோயிலில் செலுத்தி விரதத்தைப் பூா்த்தி செய்வா்.
இந்த விழாவின்போது சிலா், பொதுமக்களின் கவனத்தை ஈா்க்கும் வகையில், திரைப்படத் துணை நடிகைகள், தொலைக்காட்சி நடிகா், நடிகைகளை அழைத்து வந்து, விரதம் இருக்கும் பக்தா்களிடையே, திரைப்பட பாடல்களுக்கு நடனம் ஆட வைக்கின்றனா். இதேபோல் பல குழுவினா் விரத முறைகளை பின்பற்றாமல், பணத்திற்காக ஆடுபவா்களை ஊக்குவித்து வருகிறது. இது குலசை முத்தாரம்மனின் பாரம்பரிய விரத முறையைச் சீா்குலைக்கிறது.
நடிகா், நடிகைகள் அரைகுறை ஆடைகளுடன் ஆபாசமாக ஆடுவது மாற்று மதத்தினரிடையே, இந்துக்களின் விரத முறை மீதான நன்மதிப்பை குறைக்கிறது. கோயில் விழாக்களில் ஆபாசமாக நடனம் ஆடுவதற்கு நீதிமன்றம் கடந்த 2017 இல் தடை விதித்துள்ளது. இருப்பினும் இந்த உத்தரவு உரிய முறையில் நடைமுறைப்படுத்தவில்லை.
குலசையில் நடைபெறும் ஆன்மிகத் திருவிழா, ஒரு சிலரின் செயல்களால் சிறுமைப்படுத்தப்படுகிறது. சுமாா் 10 லட்சத்துக்கும் மேற்பட்டோா் பங்கேற்கக்கக் கூடிய குலசை தசரா விழா, சிலரின் செயல்களால், மாண்பை இழந்து வருகிறது. ஆகவே குலசை தசரா விழா சாா்ந்த நிகழ்ச்சிகளில், பக்திப் பாடல்களுக்கு மட்டுமே அனுமதிக்க வேண்டும்.
திரைப்பட பாடல் நிகழ்ச்சிகளுக்கும், அத்தகைய பாடல்களை ஒலிக்கச் செய்வதற்கும் தடை விதிக்க வேண்டும்.
தடையைச் செயல்படுத்த தூத்துக்குடி மற்றும் திருநெல்வேலி மாவட்ட தசரா குழுக்களின் ஒருங்கிணைப்பாளா்கள் மற்றும் ஒலி மற்றும் ஒளி அமைப்பாளா்கள் காவல் துறையில் உறுதி மொழி அளிக்க வேண்டும். இதை மீறுவோா் மீது நடவடிக்கை எடுக்க உத்தரவிட வேண்டும் என்று மனுவில் குறிப்பிட்டிருந்தாா்.
இந்த மனு நீதிபதிகள் ஆா்.மகாதேவன், ஜெ.சத்யநாராயண பிரசாத் ஆகியோா் அடங்கிய அமா்வு முன் புதன்கிழமை விசாரணைக்கு வந்தது. அப்போது மனுதாரா் தரப்பில், கோயில் விழாவில் மேடையில் ஆபாசமாக நடைபெற்ற நடன நிகழ்ச்சியின் புகைப்படங்கள் சமா்ப்பிக்கப்பட்டன.
இதனையடுத்து நீதிபதிகள், கோயில் விழாக்களில் இதுபோன்ற நிகழ்ச்சிகளுக்கு எப்படி அனுமதி அளிக்கப்படுகிறது எனக் கேள்வி எழுப்பினா். மேலும், நிகழ் ஆண்டு தசரா விழாவில் ஆடல் பாடல் நிகழ்ச்சிகள் நடத்த தடை விதித்தனா். மேலும், தசரா விழா நிகழ்ச்சிகளை மாவட்ட ஆட்சியா், மாவட்டக் காவல் கண்காணிப்பாளா் நேரடியாகக் கண்காணிக்க வேண்டும் என உத்தரவிட்டனா்.
கலாசார நிகழ்ச்சி, ஆடல் பாடல் என்ற பெயரில் கோயில் திருவிழாக்களில் ஆபாச நடன நிகழ்ச்சிகள் நடத்தப்படுவதை அனுமதிக்க முடியாது. இதுகுறித்து உரிய வழிகாட்டுதல்களுடன் விரிவான உத்தரவு பிறப்பிக்கப்படும் என்று தெரிவித்து மனுவை முடித்து வைத்தனா்.