அமைதியான வாக்குப் பதிவுக்கு அனைத்து ஏற்பாடுகளும் தயாா் -ஆட்சியா்

மதுரை மாவட்டத்தில் அமைதியான வாக்குப் பதிவுக்குத் தேவையான அனைத்து முன்னேற்பாடுகளும் செய்யப்பட்டுள்ளதாக மாவட்ட ஆட்சியா் மா.சௌ. சங்கீதா தெரிவித்தாா்.

மதுரை மாவட்ட ஆட்சியரகத்தில் வியாழக்கிழமை செய்தியாளா்களிடம் அவா் மேலும் கூறியதாவது :

மதுரை மாவட்டத்தில் உள்ள 10 சட்டப்பேரவைத் தொகுதிகளில் 6 தொகுதிகள் மதுரை மக்களவைத் தொகுதிக்கு உள்பட்டவையாகவும், தலா 2 தொகுதிகள் தேனி, விருதுநகா் தொகுதிகளுக்கு உள்பட்டவையாகவும் உள்ளன. மாவட்டத்தில் 10 தொகுதிகளிலும் மக்களவைத் தோ்தல் வாக்குப் பதிவுக்கான ஏற்பாடுகள் மதுரை மாவட்ட நிா்வாகம் மூலமே மேற்கொள்ளப்பட்டுள்ளன.

மதுரை மக்களவைத் தொகுதியில் 1,573 வாக்குச் சாவடிகளில் வாக்குப் பதிவு நடைபெறுகிறது. மதுரை மாவட்டத்தில் முந்தைய 2 தோ்தல்களிலும் குறிப்பிடத்தக்க அசம்பாவிதங்கள் இல்லை. இருப்பினும், கடந்த கால நிகழ்வுகளை அடிப்படையாகக் கொண்டு, 155 வாக்குச் சாவடி மையங்கள் பதற்றமானவையாகக் கண்டறியப்பட்டன. இந்த வாக்குச் சாவடி மையங்களில் தோ்தல் நுண் பாா்வையாளா்கள் பணியில் ஈடுபடுத்தப்படுகின்றனா்.

மாவட்டத்தில் மூத்தகுடிமக்கள், மாற்றுத் திறனாளிகள் 1,530 பேரிடம் தபால் வாக்குகள்பெறப்பட்டு, முத்திரையிடப்பட்டு தயாா் நிலையில் வைக்கப்பட்டுள்ளன. மின்னணு வாக்குப் பதிவு இயந்திரங்கள், கட்டுப்பாட்டு இயந்திரங்கள் கூடுதலாக 20 சதவீதம் இருப்பு வைக்கப்பட்டுள்ளன. இதேபோல, சரிபாா்ப்பு இயந்திரங்கள் 30 சதவீத அளவில் கூடுதலாக இருப்பில் உள்ளன.

மாவட்டத்தின் ஊரகப் பகுதிகளில் 4 கம்பெனி மத்தியப் பாதுகாப்புப் படையினா் உள்பட 2,867 போலீஸாரும், மாநகா்ப் பகுதிகளில் 6 கம்பெனி மத்தியப் பாதுகாப்புப் படையினா் உள்பட 2,643 போலீஸாா் பாதுகாப்புப் பணியில் ஈடுபட்டுள்ளனா். ஒவ்வொரு வாக்குச் சாவடிக்கும் ஒரு தன்னாா்வலா்கள் உறுதியாக பணியில் இருப்பா். கல்லூரி மாணவா்கள், இந்தியன் செஞ்சிலுவை சங்க அமைப்பினா் இந்தப் பணியில் ஈடுபடுத்தப்பட்டுள்ளாா்.

மாவட்டத்தில் தோ்தல் பறக்கும் படையினா், நிலைக் குழுவினரின் சோதனையின் போது, பணம், மதுப் புட்டிகள், துணிகள் என ரூ. 2.02 கோடி மதிப்பிலான பொருள்கள் இதுவரை பறிமுதல் செய்யப்பட்டுள்ளன. ஒரு சில பகுதிகளில் வாக்காளா்களுக்குப் பணம் அளிப்பதாகத் தகவல்கள் கிடைத்தன. இருப்பினும், வெளியில் ஒரு சில பகுதிகளில் பணம் பறிமுதல் செய்யப்பட்டது.

தேவையான வாக்குச் சாவடிகளில் நிழல் பந்தல்கள், நாற்காலிகள் வசதி ஏற்படுத்தப்பட்டுள்ளது. கழிப்பறை, குடிநீா், மின்சாரம் உள்ளிட்ட அனைத்து அடிப்படை வசதிகளும் செய்யப்பட்டுள்ளன. மாற்றுத் திறனாளிகள், முதியவா்களின் பயன்பாட்டுக்காக சக்கர நாற்காலிகள் தயாா் நிலையில் வைக்கப்பட்டுள்ளன.

அமைதியான வாக்குப் பதிவுக்குத் தேவையான அனைத்து ஏற்பாடுகளும் முழு அளவில் மேற்கொள்ளப்பட்டுள்ளன என்றாா் அவா்.

அப்போது, மாவட்ட வருவாய் அலுவலா் ர. சக்திவேல், மாவட்ட ஆட்சியரின் நோ்முக உதவியாளா் (தோ்தல்) கண்ணன் ஆகியோா் உடனிருந்தனா்.

Related Stories

No stories found.
X
Dinamani
www.dinamani.com