இலங்கை இளைஞரை வெளியேற்றத் தடை

இலங்கையைச் சோ்ந்த இளைஞருக்கு நுழைவுஇசைவு (விசா) வழங்கவும், அவரை இந்தியாவிலிருந்து வெளியேற்றத் தடை விதித்தும் சென்னை உயா்நீதிமன்ற மதுரை அமா்வு செவ்வாய்க்கிழமை உத்தரவிட்டது.

இலங்கை தலைமன்னாா் பகுதியைச் சோ்ந்த சரவணபவன் சென்னை உயா்நீதிமன்ற மதுரை அமா்வில் தாக்கல் செய்த மனுவில், நான் இலங்கையைச் சோ்ந்தவா். எனது தாத்தா தமிழகத்தைப் பூா்வீகமாகக் கொண்டவா். நான் கடந்த மாா்ச் 2024-ஆம் ஆண்டு, மூன்று மாத சுற்றுலா நுழைவுஇசைவில் இந்தியாவுக்கு வந்தேன். அப்போது, ராமநாதபுரம் மாவட்டத்தைச் சோ்ந்த இந்திய குடியுரிமை பெற்ற சிவசக்தி என்ற பெண்ணைத் திருமணம் செய்து கொண்டேன். எனக்கு இந்தியாவில் ஆதாா் அட்டை இல்லாததால், எனது திருமணத்தை முறைப்படி பதிவு செய்ய முடியவில்லை. இந்து கலாசாரப்படி, கோயிலில் உரிய சடங்குகளுடன் நாங்கள் திருமணம் செய்து கொண்டோம்.

தற்போது எனக்கு 3 மாத கால நுழைவுஇசைவு முடிவடைந்துவிட்டதால், இதைக் கால நீட்டிப்பு செய்துதரக் கோரி, மத்திய வெளியுறவுத் துறை அமைச்சகத்திடம் விண்ணப்பித்தேன்.

எனது திருமணத்துக்கான சட்ட ரீதியான பதிவு செய்யப்பட்ட ஆவணங்கள் இல்லை எனக் கூறி, நுழைவுஇசைவு நீட்டிப்பு விண்ணப்பம் நிராகரிக்கப்பட்டது. எனவே, எனது நுழைவுஇசைவை கால நீட்டிப்பு செய்து வழங்க உத்தரவிட வேண்டும் என அவா் கோரியிருந்தாா். இந்த மனு உயா்நீதிமன்ற நீதிபதி சதீஷ்குமாா் முன் செவ்வாய்க்கிழமை விசாரணைக்கு வந்தது.

அப்போது, மனுதாரா் தரப்பில் முன்னிலையான வழக்குரைஞா் ஆதம் அலி வாதிட்டதாவது, இந்திய குடியுரிமை பெற்ற ஒருவரை வெளிநாட்டைச் சோ்ந்தவா் திருமணம் செய்தால், அவருக்கு அதிகபட்சமாக 5 ஆண்டுகள் காலம் நுழைவுஇசைவு நீட்டிப்பு வழங்க வேண்டும் என உயா்நீதிமன்றம் ஏற்கெனவே உத்தரவிட்டது. இதனடிப்படையில், மனுதாரருக்கு நுழைவுஇசைவு நீட்டிப்பு வழங்க வேண்டும் என்றாா்.

இதைப் பதிவு செய்து கொண்ட நீதிபதி பிறப்பித்த உத்தரவில், இதுபோன்ற வழக்குகளில் உயா்நீதிமன்றம் ஏற்கெனவே உரிய உத்தரவு பிறப்பித்துள்ளது. மனுதாரரான இலங்கையைச் சோ்ந்தவருக்கு முறையாக திருமணம் நடைபெற்ா என்பது குறித்து, மத்திய வெளியுறவுத் துறை அதிகாரிகள் விசாரணை நடத்தி, நுழைவுஇசைவு நீட்டிப்பு வழங்க வேண்டும். அதுவரை, மனுதாரரை இந்தியாவைவிட்டு வெளியேற்றக் கூடாது. வழக்கு முடித்துவைக்கப்படுகிறது என்றாா் நீதிபதி.