பராமரிப்புப் பணிகள்: திருச்செந்தூா், ராமேசுவரம் ரயில்கள் புறப்படும் நேரங்களில் மாற்றம்

மதுரை, திருச்சி கோட்டங்களில் ரயில் பாதை பராமரிப்புப் பணிகள் நடைபெறுவதையொட்டி, திருச்செந்தூா், ராமேசுவரம் ரயில்கள் புறப்படும் நேரங்கள் மாற்றப்பட்டுள்ளது.

இதுகுறித்து மதுரை கோட்ட ரயில்வே மேலாளா் அலுவலகம் வெளியிட்ட செய்திக் குறிப்பு:

மதுரை-சிலைமான் ரயில் பாதையிலும், திருச்சி ரயில்வே கோட்டத்துக்குள்பட்ட பகுதிகளிலும் பராமரிப்புப் பணிகள் நடைபெறவுள்ளன. இதையொட்டி, திருச்செந்தூா்-சென்னை (20606) அதிவிரைவு ரயில் அக். 1-ஆம் தேதி திருச்செந்தூரிலிருந்து இரவு 8.25 மணிக்கு பதிலாக, இரவு 10.35 மணிக்குப் புறப்படும்.

மதுரையிலிருந்து காலை 6.50 மணிக்குப் புறப்பட வேண்டிய மதுரை - ராமேசுவரம் (06651) பயணிகள் ரயில் அக். 3-ஆம் தேதி காலை 8.05 மணிக்கும், அக். 4-ஆம் தேதி காலை 8.10 மணிக்கும் புறப்படும்.