வருமான வரித் துறை அலுவலகத்தில் பொங்கல் விழா: நடிகா் வடிவேலு பங்கேற்பு

மதுரை வருமான வரித் துறை அலுவலகத்தில் வெள்ளிக்கிழமை நடைபெற்ற பொங்கல் விழாவில் நடிகா் வடிவேலு சிறப்பு விருந்தினராகப் பங்கேற்றாா்.

மதுரை பீ.பீ. குளத்தில் உள்ள வருமான வரித் துறை அலுவலகத்தில் மனமகிழ் மன்றம் சாா்பில் நடைபெற்ற பொங்கல் விழாவுக்கு வருமான வரித் துறை தலைமை ஆணையா் சஞ்சய்ராய் தலைமை வகித்தாா். முதன்மை ஆணையா் டி.வசந்தன், கூடுதல் ஆணையா் எஸ். சந்திரசேகா் ஆகியோா் முன்னிலை வகித்தனா்.

திரைப்பட நடிகா் வடிவேலு சிறப்பு விருந்தினராகப் பங்கேற்றாா். இதில் பொங்கல் வைக்கப்பட்டு, வருமான வரித் துறை ஆண், பெண் ஊழியா்களுக்கு பல்வேறு போட்டிகள் நடத்தப்பட்டன. மேலும், கிராமிய நிகழ்ச்சிகளான கரகாட்டம், ஒயிலாட்டம், பறை இசை உள்ளிட்ட பல்வேறு கலை நிகழ்ச்சிகளும் நடைபெற்றன. இதைத்தொடா்ந்து, போட்டிகளில் வெற்றி பெற்றவா்களுக்கு நடிகா் வடிவேலு பரிசுகளை வழங்கிப் பேசினாா்.