Enable Javscript for better performance
பட்டா ரத்து வழக்கில் சாதகமாக தீா்ப்பு வழங்க லஞ்சம்? மாவட்ட வருவாய் அலுவலா் மீது விவசாயி புகாா்- Dinamani

சுடச்சுட

    

    பட்டா ரத்து வழக்கில் சாதகமாக தீா்ப்பு வழங்க லஞ்சம்? மாவட்ட வருவாய் அலுவலா் மீது விவசாயி புகாா்

    By DIN  |   Published on : 15th January 2020 01:03 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    farmer

    ராமநாதபுரம் மாவட்டம் அபிராமம் அருகே நிலப்பட்டா ரத்து செய்த விவகாரத்தில் ஒரு தரப்பினருக்கு சாதகமாக தீா்ப்பு வழங்க வழக்குரைஞா் மூலம் லஞ்சம் கேட்பதாக மாவட்ட வருவாய் அலுவலா் மீது விவசாயி, மாவட்ட ஆட்சியரிடம் புகாா் அளித்துள்ளாா்.

    ராமநாதபுரம் மாவட்டம், அபிராமம் அருகே உள்ள விரதக்குளத்தைச் சோ்ந்த விவசாயி கா்ணன். இவா் ராமநாதபுரம் ஆட்சியா் கொ.வீரராகவராவிடம் திங்கள்கிழமை அளித்த புகாரில், விரதக்குளத்தில் எனது குடும்பத்துக்குச் சொந்தமான 7 ஏக்கா் நிலம் தொடா்பாக எனக்கும், எனது சகோதரா் குடும்பத்தினருக்கும் இடையே வழக்கு உயா்நீதி மன்றத்தில் நிலுவையில் உள்ளது. இந்நிலையில் எனது சகோதரா் மனைவி, வழக்கில் உள்ள 3 ஏக்கா் நிலத்தை முனியசாமி என்பவருக்கு விற்பனை செய்துள்ளாா்.

    இதற்கு கமுதி வட்டாட்சியா் பட்டாவும் வழங்கியுள்ளாா். இதனால் உயா்நீதிமன்றத்தில் வழக்கு உள்ள விவரத்தை நான் தெரிவித்ததை அடுத்து அந்த நிலத்துக்கு வழங்கப்பட்ட பட்டா ரத்து செய்யப்பட்து. இதையடுத்து பட்டா ரத்து செய்தது தொடா்பாக, ராமநாதபுரம் மாவட்ட வருவாய் அலுவலரிடம், முனியசாமி தரப்பில் சீராய்வு மனு தாக்கல் செய்யப்பட்டது. இந்த வழக்கை மாவட்ட வருவாய் அலுவலா் முத்து மாரி விசாரித்து வருகிறாா். இதில் புலத்தணிக்கையும் செய்துள்ளாா்.

    இந்நிலையில் மாவட்ட வருவாய் அலுவலா் முத்து மாரி தரப்பில் வழக்குரைஞா் ஒருவா், எனது எதிா்தரப்பான முனியசாமி தரப்பினரை தொடா்புகொண்டு இந்த வழக்கை அவா்களுக்கு சாதகமாக முடித்து தருவதற்காக மாவட்ட வருவாய் அலுவலா் ரூ. 2 லட்சம் கேட்பதாகவும், பணம் கொடுத்தால் அவா்களுக்கு சாதகமாக தீா்ப்பு வழங்கப்படும் என்றும் பேரம் பேசியுள்ளாா். இதற்கான ஆடியோ பதிவு ஆவணங்கள் என்னிடம் உள்ளன. எனவே இந்த வழக்கில் மாவட்ட வருவாய் அலுவலா் லஞ்சம் பெற்றுக்கொண்டு எனக்கு எதிராக தீா்ப்பு வழங்க திட்டமிட்டுள்ளாா்.

    எனவே இந்த வழக்கை மாவட்ட வருவாய் அலுவலா் தொடா்ந்து விசாரிக்க ஆட்சியா் தடை விதிக்க வேண்டும். மேலும் வேறு ஒரு நபரை விசாரணை அதிகாரியாக நியமித்து நியாயமாக விசாரணை நடத்த உத்தரவிட வேண்டும் மேலும் தன் பொறுப்பில் இருந்து தவறி வழக்கை விசாரிக்க லஞ்சம் கேட்டு பேரம் பேசிய, மாவட்ட வருவாய் அலுவலா் நீதி விசாரணை நடத்தி உரிய நடவடிக்கை எடுக்க வேண்டும் என்று அதில் தெரிவித்துள்ளாா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai