பரமக்குடி: பரமக்குடி அருகே உள்ள கமுதக்குடி நூற்பாலை (பயோனியா் ஸ்பின்னா்ஸ் மில்) கூட்டுறவு சங்க உறுப்பினா்கள், புதன்கிழமை நூற்பாலை முன்பு தா்னாவில் ஈடுபட்டனா்.
கமுதக்குடி பகுதியில் இயங்கிவரும் (பயோனியா் ஸ்பின்னா்ஸ்) நூற்பாலையில் 750-க்கும் மேற்பட்ட நிரந்தர மற்றும் தினக்கூலி தொழிலாளா்கள் வேலை செய்து வருகின்றனா். இதில் 225 உறுப்பினா்களைக் கொண்ட (பயோனியா் ஸ்பின்னா் மில்) தொழிலாளா் கூட்டுறவு சிக்கன நாணய சங்கம் இயங்கி வருகிறது. இதன் தலைவராக அதிமுகவைச் சோ்ந்த பூமிநாதன் செயல்பட்டு வருகிறாா். இவா் சங்க விதிமுறைகளை மீறி தன்னிச்சையாக செயல்பட்டு வருவதாகவும், இதனால் சங்கத் தலைவா் பூமிநாதன் மீது சங்க உறுப்பினா்கள் அனைவரும் நம்பிக்கை இல்லாத் தீா்மானம் கொண்டுவரப்பட வேண்டும் என கோரிக்கை விடுத்துள்ளனா்.
அதனடிப்படையில், கூட்டுறவு சங்கங்களின் துணைப் பதிவாளா் அதற்கான உத்தரவு கடிதமும் அளித்துள்ளாா். அந்த உத்தரவின் பேரில், ஜூலை 29 -ஆம் தேதி கள அலுவலா் திருலோகசந்தா் முன்னிலையில் நம்பிக்கை இல்லாத் தீா்மானத்துக்கான வாக்கெடுப்பு நடத்தும்படி அறிவிக்கப்பட்டிருந்தது.
அந்த அறிவிப்பின்படி, சங்கத்தின் அனைத்து நிா்வாகக் குழு உறுப்பினா்களும் அங்கு வாக்களிக்க வந்திருந்தனா். ஆனால், எந்தவித முன்னறிவிப்பும் இல்லாமல் தோ்தல் ரத்து செய்யப்பட்டதாக அறிவிக்கப்பட்டது. இதனால் வாக்களிக்க வந்திருந்த சங்க உறுப்பினா்கள் நூற்பாலை முன்பு நம்பிக்கை இல்லாத் தீா்மானத்துக்கான வாக்கெடுப்பு நடத்த வேண்டும் என தா்னாவில் ஈடுபட்டனா்.