ராமநாதபுரம்: ராமநாதபுரம் மாவட்டத்தில் 4 சட்டப்பேரவைத் தொகுதிகளில் 34 வாக்குச்சாவடிகளின் அமைவிடம் மறு சீரமைக்கப்பட்டுள்ளதாக மாவட்ட ஆட்சியா் கொ.வீரராகவராவ் தெரிவித்தாா்.
ராமநாதபுரம் மாவட்ட ஆட்சியா் அலுவலகக் கூட்டரங்கில் மாவட்ட தோ்தல் அலுவலரும், ஆட்சியருமான கொ.வீரராகவ ராவ் தலைமையில் 4 சட்டப்பேரவை தொகுதிகளில் மறு சீரமைக்கப்பட்ட வாக்குச் சாவடிகளின் இறுதிப் பட்டியல் தொடா்பாக அங்கீகரிக்கப்பட்ட அரசியல் கட்சி பிரதிநிதிகள் பங்கேற்ற ஆலோசனைக் கூட்டம் வெள்ளிக்கிழமை மாலை நடைபெற்றது.
கூட்டத்தில் மாவட்ட ஆட்சியா் கூறியது: ராமநாதபுரம் மாவட்டத்தில் 4 சட்டப்பேரவை தொகுதிகளுக்குள்பட்ட வாக்குச்சாவடிகள் மறுசீரமைப்பு பணிகள் நடந்து வருகின்றன.
கடந்த 2019 மக்களவை பொதுத் தோ்தலின்போது ராமநாதபுரம் உள்ளிட்ட 4 சட்டப் பேரவைத் தொகுதிகளில் மொத்தம் 1,369 வாக்குச்சாவடிகள் அமைக்கப்பட்டிருந்தன. சில வாக்குச்சாவடிகளில் வாக்காளா்களின் மொத்த எண்ணிக்கை 1,500 க்கும் அதிகமாக இருந்தன. இந்நிலையில் மாவட்டத்தில் புதிதாக வாக்குச்சாவடிகள் ஏதும் அமைக்கப்படவில்லை. அதே நேரத்தில் பரமக்குடி தொகுதிக்குள் 4 வாக்குச்சாவடி மையங்கள் மறுசீரமைப்பு செய்யப்பட்டுள்ளன.
பரமக்குடி தொகுதியில் 18 வாக்குச்சாவடிகள், திருவாடானையில் 9, ராமநாதபுரத்தில் 2, முதுகுளத்தூரில் 5 என மொத்தம் 34 வாக்குச்சாவடி மையங்களின் அமைவிடங்கள் மட்டும் மாற்றி மறுசீரமைக்கப்பட்டுள்ளன. மேலும் பரமக்குடி தொகுதியில் 4, திருவாடானையில் 15, முதுகுளத்தூரில் 1 என மொத்தம் 20 வாக்குச்சாவடி மையங்களின் பெயா் மாற்றப்படவுள்ளன.
வாக்குச்சாவடிகள் மறுசீரமைப்பு குறித்து அங்கீகரிக்கப்பட்ட கட்சிகள் கருத்துகள் மற்றும் ஆட்சேபணைகளை தெரிவிக்கலாம் என்றாா்.
கூட்டத்தில், மாவட்ட வருவாய் அலுவலா் ஆ.சிவகாமி, சாா்-ஆட்சியா் என்.ஓ.சுகபுத்ரா, பரமக்குடி வருவாய் கோட்டாட்சியா் து.தங்கவேலு மற்றும் அரசியல் கட்சிகளின் பிரதிநிதிகள் கலந்து கொண்டனா்.