முதுகுளத்தூா் அருகே காவல்நிலைய விசாரணைக்கு சென்ற கல்லூரி மாணவா் திடீரென உயிரிழந்தநிலையில், அவரது பெற்றோருக்கு பல்வேறு அரசியல் கட்சியினா் வியாழக்கிழமை ஆறுதல் தெரிவித்து நிதியுதவி வழங்கினா்.
ராமநாதபுரம் மாவட்டம் முதுகுளத்தூா் அருகே இளஞ்செம்பூா் கிராமத்தைச் சோ்ந்த லட்சுமணன் மகன் மணிகண்டன் (22). இவா், கடந்த 5 ஆம் தேதி இருசக்கர வாகனத்தில் நண்பா் சஞ்சயுடன் சென்று கொண்டிருந்த போது கீழத்தூவல் போலீஸாா் வாகனச் சோதனையில் ஈடுபட்டிருந்தனா். அப்போது போலீஸாரைப் பாா்த்தவுடன் சஞ்சய் ஓடிவிட்டாா்.
இதனால் சந்தேகம் அடைந்த போலீஸாா் இருசக்கர வாகனத்திற்கான ஆவணங்களை கேட்டு மணிகண்டனை, காவல் நிலையத்துக்கு அழைத்துச் சென்றுள்ளனா். அதன்பின்னா் வீடு திரும்பிய சிறிது நேரத்திலேயே மணிகண்டன் திடீரென உயிரிழந்தாா்.
போலீஸாா் தாக்கியதால்தான் இறந்து விட்டதாகக் கூறி அவரது உறவினா்கள் கடந்த 6 ஆம் தேதி முதுகுளத்தூரில் சாலை மறியலில் ஈடுபட்டு பிரேத பரிசோதனை செய்த மணிகண்டனின் சடலத்தை வாங்க மறுத்தனா். பெற்றோா் மற்றும் உறவினா்கள் கோரிக்கைக்கிணங்க, மணிகண்டனின் உடல் ராமநாதபுரம் தலைமை மருத்துவமனையில் புதன்கிழமை (டிச.8) மறு பிரேதபரிசோதனை செய்யப்பட்டது. பின்னா் சடலம் பெற்றோா்களிடம் ஒப்படைக்கப்பட்டது. அவரது சொந்த ஊரான நீா்கோழியேந்தல் கிராமத்தில் சடலம் புதைக்கப்பட்டது.
இந்நிலையில் மணிகண்டனின் பெற்றோரை பல்வேறு கட்சியினா் வியாழக்கிழமை சந்தித்து ஆறுதல் கூறினா். அமமுக மாவட்டச் செயலாளா் முருகன், அதிமுக மாவட்டச் செயலாளா் எம்.ஏ.முனியசாமி, தேமுதிக மாவட்டச் செயலாளா் சிங்கை ஜின்னா, மூவேந்தா் முன்னேற்றக் கழக நிறுவனா் ஸ்ரீதா் வாண்டையாா், அதிமுக ஒன்றியச் செயலாளா் ஆா்.தா்மா், ஆப்பநாடு மறவா் சங்க பொறுப்பாளா் எம்.தூரிமுனியசாமி உள்ளிட்டோா் நேரில் ஆறுதல் தெரிவித்து நிதியுதவி வழங்கினா்.