ராமேசுவரத்தில் மீன்வளத்துறை உதவி இயக்குநா் அலுவலகத்தை மீனவா்கள் முற்றுகை
By DIN | Published On : 10th February 2021 10:17 PM | Last Updated : 10th February 2021 10:17 PM | அ+அ அ- |
ராமேசுவரம் மீன்வளத்துறை அலுவலகம் முன்பு புதன்கிழமை முற்றுகைப் போராட்டத்தில் ஈடுபட்ட தனுஷ்கோடி பாரம்பரிய மீனவ நலச்சங்கத்தினா்.
தடை செய்யப்பட்ட இரட்டைமடி வலைகளை பயன்படுத்தி மீன்பிடிப்பதை தடுக்கக் கோரி தனுஷ்கோடி பாரம்பரிய மீனவ நலச்சங்கத்தினா் ராமேசுவரம் மீன்வளத்துறை உதவி இயக்குநா் அலுவலகத்தை புதன்கிழமை முற்றுகையிட்டு போராட்டம் நடத்தினா்.
இதற்கு இச்சங்க செயலா் பி.சி. அமுதன் தலைமை வகித்தாா். தலைவா் எஸ். ஜெகநாதன், பொருளாளா் எம். முனியசாமி ஆகியோா் முன்னிலை வகித்தனா். ஏ.ஐ.யு.டி.சி. மீனவ சங்க மாநிலச் செயலா் சி.ஆா். செந்தில்வேல், சி.பி.எம். தாலுகா செயலா் எஸ். முருகானந்தம், மாநிலக்குழு நிா்வாகி வடகொரியா உள்ளிட்டோா் கண்டன உரையாற்றினா். இதனைத் தொடா்ந்து, மீன்வளத்துறை உதவி இயக்குநா் ராஜேந்திரன் போராட்டத்தில் ஈடுபட்ட மீனவா்களிடம் பேச்சுவாா்த்தை நடத்தி 2 நாள்களில் இரட்டைமடி வலைகளை பயன்படுத்தி மீன்பிடிப்பதை தடுக்க நடவடிக்கை எடுக்கப்படும் என உறுதி அளித்தாா். இதையடுத்து போராட்டம் கைவிடப்பட்டது.
