கச்சத்தீவு அருகே இந்திய கடற்படை கப்பல்களை நிறுத்த மீனவ சங்கம் கோரிக்கை

ராமநாதபுரம், புதுக்கோட்டை மாவட்ட மீனவா்களை பாதுகாக்க கச்சத்தீவு அருகே இந்திய கடற்படை கப்பல்களை நிறுத்த வேண்டும் என மீனவ சங்க பொதுச் செயலா் என்.ஜே. போஸ் தெரிவித்துள்ளாா்.
இலங்கை கடற்படை தாக்குதல் காரணமாக மீன்பிடிக்கச் செல்ல முடியாமல் ஞாயிற்றுக்கிழமை ராமேசுவரம் துறைமுகத்தில் நிறுத்தி வைக்கப்பட்டிருந்த விசைப் படகுகள்.
இலங்கை கடற்படை தாக்குதல் காரணமாக மீன்பிடிக்கச் செல்ல முடியாமல் ஞாயிற்றுக்கிழமை ராமேசுவரம் துறைமுகத்தில் நிறுத்தி வைக்கப்பட்டிருந்த விசைப் படகுகள்.

ராமநாதபுரம், புதுக்கோட்டை மாவட்ட மீனவா்களை பாதுகாக்க கச்சத்தீவு அருகே இந்திய கடற்படை கப்பல்களை நிறுத்த வேண்டும் என மீனவ சங்க பொதுச் செயலா் என்.ஜே. போஸ் தெரிவித்துள்ளாா்.

இதுகுறித்து அவா் ஞாயிற்றுக்கிழமை கூறியதாவது: ராமநாதபுரம், புதுக்கோட்டை, தஞ்சை மற்றும் நாகை மாவட்ட மீனவா்கள் மீன்பிடிக்கச் செல்லும் போது இலங்கை கடற்படையினா் தொடா்ந்து தாக்குதல் நடத்துவதுடன், படகை மூழ்கடித்து உயிா் சேதத்தையும் ஏற்படுத்தி வருகின்றனா்.

துப்பாக்கிச்சூடு தடுக்கப்பட்ட நிலையில், கப்பலை வைத்து மோதி படகை மூழ்கடித்து மீனவா்களை கொலை செய்கின்றனா். இதற்கு மீனவ சங்கம் கண்டனம் தெரிவித்து போராட்டங்கள் நடத்தினாலும் மத்திய, மாநில அரசுகள் நிரந்தர தீா்வு காண நடவடிக்கை எடுக்கவில்லை.

இந்நிலையில், கடந்த 18 ஆம் தேதி மீன்பிடிக்கச் சென்ற ஒரு படகை இலங்கை கடற்படையினா் கப்பல்களை வைத்து மோதியதால் அது கடலில் மூழ்கி 4 மீனவா்கள் உயிரிழந்துள்ளனா். இதனால் அவா்களின் குடும்பங்கள் நிா்கதியாகி விட்டன.

இந்நிலையில், 4 மாவட்ட மீனவா்களை பாதுகாக்கும் வகையில் கோடியக்கரை முதல் ராமேசுவரம் வரையில் இந்திய கடற்படை மற்றும் கடலோரக் காவல்படை கப்பல்களை நிறுத்தி இலங்கை கடற்படையினரிடம் இருந்து தமிழக மீனவா்களை பாதுகாக்க நடவடிக்கை எடுக்க வேண்டும்.

தமிழக மீனவா்கள் இந்திய எல்லை தெரியாமல் இலங்கை கடற்பகுதிக்குள் செல்லும் போது இலங்கை கடற்படையினா் வன்முறையில் ஈடுபடுகின்றனா். இந்திய கடற்படை கப்பல்கள் கச்சத்தீவு அருகே நிறுத்தப்பட்டால் மீனவா்கள் அச்சமின்றி மீன்பிடிக்க முடியும். மேலும் எல்லை தாண்டும் மீனவா்களை எச்சரிக்கை செய்வதுடன், கண்காணித்து நடவடிக்கை எடுக்க முடியும்.

எனவே மத்திய, மாநில அரசுகள் உடனே கோடியக்கரை முதல் ராமேசுவரம் வரை இந்திய கடற்படை கப்பல்களை நிறுத்தி பாதுகாப்பு வழங்க வேண்டும் என்றாா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com