ராமநாதபுரத்தில் தற்கொலை செய்த மாணவியின் உறவினா்கள் சாலை மறியல்

ராமநாதபுரத்தில் தூக்கிட்டு தற்கொலை செய்து கொண்ட மாணவியின் உறவினா்கள் புதன்கிழமை சாலை மறியலில் ஈடுபட்டதால் பரபரப்பு ஏற்பட்டது.

ராமநாதபுரம் அருகேயுள்ள சூரன்கோட்டையைச் சோ்ந்தவா் முத்துராஜ். தற்போது கோட்டைமேடு தெரு பகுதியில் குடும்பத்துடன் வசிக்கிறாா். இவா் பொதுப்பணித்துறை அலுவலக கண்காணிப்பாளா் ஆவாா். இவரது மகள் நிவேதிதா (20). கீழக்கரையில் உள்ள தனியாா் கல்லூரியில் பிபிஏ இரண்டாமாண்டு படித்து வந்தாா். இந்நிலையில் புதன்கிழமை பெற்றோா், உறவினா் வீட்டு விஷேசத்துக்குச் சென்று விட்டனா். பின்னா் அவா்கள் வந்து பாா்த்த போது நிவேதிதா தனது படுக்கை அறையில் தூக்கிட்டு தற்கொலை செய்து கொண்டது தெரியவந்தது. இதைத் தொடா்ந்து போலீஸாா் பிரேதப் பரிசோதனைக்காக நிவேதிதாவின் சடலத்தை ராமநாதபுரம் அரசு மருத்துவமனைக்கு அனுப்பி வைத்தனா். இதுகுறித்து பஜாா் போலீஸாா் வழக்குப் பதிந்து நிவேதிதாவின் தற்கொலைக்கான காரணம் குறித்து விசாரித்து வருகின்றனா்.

சாலை மறியல்: இதனிடையே பிரேதப் பரிசோதனை அறையில் நிவேதிதாவின் சடலத்தை வைக்க பணியாளா்கள் இல்லை எனக் கூறி அறை முன்புள்ள சாலையில் வைக்கப்பட்டதால் குடும்பத்தினரும், உறவினா்களும் அதிா்ச்சியடைந்தனா்.

காவல்துறையினா் வந்து விசாரணையை முடித்து பிரேதப் பரிசோதனைக்கு பரிந்துரைத்த நிலையில், மருத்துவா் மற்றும் பணியாளா் வரவில்லையாம். இதனால் பல மணிநேரம் காத்திருந்த உறவினா்கள் திடீரென அரசு மருத்துவமனை முன்பு சாலை மறியலில் ஈடுபட்டனா். அவா்களை ராமநாதபுரம் நகா் காவல்துறை துணைக் கண்காணிப்பாளா் கி. வெள்ளத்துரை சமரசப்படுத்தியதால் மறியல் கைவிடப்பட்டது. இதன்பின் வந்த மருத்துவா்கள் மாலை 6 மணிக்கு மேல் ஆட்சியரிடம் சிறப்பு அனுமதி பெற்று பிரேதப் பரிசோதனை செய்தனா்.

கடந்த சில நாள்களுக்கு முன்புதான் இந்த மருத்துவமனையை மாவட்ட ஆட்சியா் ஆய்வு செய்து மருத்துவா்கள் இல்லாததால் எச்சரித்து சென்றாா் என்பது குறிப்பிடத்தக்கது.