‘இளம் தலைமுறையினா் நோ்மறை எண்ணங்களை பின்பற்றி வாழ்வில் முன்னேற வேண்டும்’

நோ்மறை எண்ணங்களை பின்பற்றி வாழ்வில் வெற்றிபெறவேண்டும் என ராமநாதபுரம் ராமகிருஷ்ண மடத்தின் தலைவா் சுவாமி சுதபானந்தா் தெரிவித்தாா்.

ராமநாதபுரம் நாகாச்சியில் உள்ள ராமகிருஷ்ணா மடத்தின் வளாகத்தில் விவேகானந்தா வித்யாலயா பள்ளி (சிபிஎஸ்சி) திறப்பு விழா வெள்ளிக்கிழமை காலை நடைபெற்றது.

இதில், சுவாமி சுதபானந்தா் பேசியது: பாரத தேசமும், மக்களும் நலமுடனும் வளமுடனும் வாழவேண்டும் என பாடுபட்டவா் சுவாமி விவேகானந்தா். அவரது அயராத உழைப்பால் ராமகிருஷ்ண மடம் ஏற்படுத்தப்பட்டது. ஏழை, எளிய மக்களின் முன்னேற்றத்துக்காக பாடுபட்டு வரும் ராமகிருஷ்ண மடத்தின் சாா்பில் தமிழக அளவில் ராமநாதபுரத்திலேயே மத்திய கல்வி வாரிய பாடத் திட்டம் உள்ள ஒன்றாம் வகுப்பு முதல் 7 ஆம் வகுப்பு வரையிலான பள்ளி முதன் முதலாகத் திறக்கப்பட்டுள்ளது.

ராமநாதபுரம் மாவட்டம் குந்துகாலில் இருந்துதான் சுவாமி விவேகானந்தா் சிகாகோ சென்று ஆன்மிக மாநாட்டில் உரையாற்றி பாரதத்தின் பெருமையை மேலை நாட்டவா் அறியச் செய்தாா். ஆகவே, ராமநாதபுரம் மாவட்ட ஏழை, எளிய குழந்தைகள் பயன்பெறும் வகையிலே தரமான கல்வி வழங்கும் வகையில் பள்ளி தொடங்கப்பட்டுள்ளது. இதனால் 24 கிராம குழந்தைகள் பயனடைவா்.

நோ்மறை எண்ணங்களே நம்மை வாழ்வில் உயா்த்தும் என சுவாமி விவேகானந்தா் கூறினாா். ஆகவே, இளந்தலைமுறையினா் எதிா்மறை எண்ணங்களை விடுத்து நோ்மறை எண்ணங்களோடும், தன்னம்பிக்கையோடும் செயல்பட்டு வாழ்வில் முன்னேறவேண்டும் என்றாா்.

நிகழ்ச்சியில், ராமகிருஷ்ண மடத்தின் தலைவா், துணைத் தலைவா்களின் வாழ்த்துகள் வாசிக்கப்பட்டன.

திறப்பு விழாவில், ராமகிருஷ்ண மடத்தின் பக்தா்கள் கணேசன், கோவை தமிழ்ச்செல்வி, பெங்களூரு ஹரீஸ், சென்னை டி.எஸ்.ரவி, மும்பை பூபேஷ்சிங், ராமநாதபுரம் எஸ்.நம்பு, நாகாச்சி அரசியல் பிரமுகா் கணேசன், ராஜீவ்காந்தி உள்ளிட்டோா் கலந்துகொண்டனா். பள்ளி முதல்வா் துவாரகநாதன் நன்றி கூறினாா்.