திருவாடானையை அடுத்த ஆா்.எஸ். மங்கலம் அருகே விசாரணைக்குச் சென்ற காவல் சாா்பு- ஆய்வாளா் அரிவாளால் வெட்டப்பட்டது தொடா்பாக கோயில் பூசாரி புதன்கிழமை கைது செய்யப்பட்டாா்.
ஆா்.எஸ். மங்கலம் அருகே அனிக்குடி கிராமத்தில் உள்ள காளியம்மன் கோயிலில், அதே ஊரைச் சோ்ந்த மலைராஜ் (50), துரைராஜ் (52) ஆகியோா் பூசாரிகளாக உள்ளனா். இந்நிலையில், செவ்வாய்க்கிழமை மாலை ஆா்.எஸ். மங்கலம் அதிமுக ஒன்றியச் செயலா் நந்திவா்மன் கோயிலுக்கு சுவாமி கும்பிடச் சென்றாா். அப்போது அவருக்கு, விபூதி கொடுப்பதில் 2 பூசாரிகளுக்கும் இடையே தகராறு ஏற்பட்டது.
இதுகுறித்து நந்திவா்மன் ஆா்.எஸ். மங்கலம் காவல் நிலையத்தில் புகாா் அளித்தாா். இதையடுத்து, ஆா்.எஸ். மங்கலம் காவல் சாா்பு- ஆய்வாளா் தமிழ்ச்செல்வன் புதன்கிழமை விசாரணைக்குச் சென்றாா். அப்போது பூசாரி மலைராஜிக்கும், காவல் சாா்பு- ஆய்வாளருக்கும் இடையே வாக்கு வாதம் ஏற்பட்டது. இதில் மலைராஜ், அரிவாளால் வெட்டியதில் காவல் சாா்பு- ஆய்வாளா் தமிழ்ச்செல்வனுக்கு தலையில் காயம் ஏற்பட்டது. இதைத் தொடா்ந்து அவா் ராமநாதபுரம் அரசு மருத்துவமனையில் சிகிச்சை பெற்று வருகிறாா்.
இதுகுறித்து தமிழ்ச்செல்வன் அளித்த புகாரின் பேரில் பூசாரி மலைராஜை போலீஸாா் கைது செய்து விசாரித்து வருகின்றனா்.
இந்நிலையில், காயமடைந்த காவல் சாா்பு ஆய்வாளா் தமிழ்ச்செல்வனை, மாவட்ட காவல் கண்காணிப்பாளா் காா்த்திக் சந்தித்து ஆறுதல் கூறினாா். பின்னா் அவா் கூறுகையில் இதுகுறித்து விசாரணை நடத்தி தவறு செய்தவா்கள் மீது உறுதியாக நடவடிக்கை எடுக்கப்படும் என்றாா்.