ராமநாதபுரம் மாவட்டத்தில் 312 இடங்களில் விநாயகா் சிலைகள் அமைத்து பூஜை
By DIN | Published On : 31st August 2022 12:00 AM | Last Updated : 31st August 2022 12:00 AM | அ+அ அ- |
rmdvinayaga_(2)_3008chn_67_2
ராமநாதபுரம் மாவட்டத்தில் விநாயகா் சதுா்த்தியை முன்னிட்டு புதன்கிழமை 312 இடங்களில் சிலைகள் அமைத்து சிறப்புப் பூஜைகள் நடைபெறுகின்றன. மாவடட அளவில் 1500 போலீஸாா் பாதுகாப்புப் பணியில் ஈடுபடுகின்றனா்.
விநாயகா் சதுா்த்தியை முன்னிட்டு ராமநாதபுரம் மாவட்டத்தில் இந்து முன்னணி உள்ளிட்ட அமைப்புகள் சாா்பில் சிலைகள் அமைக்கப்படுகின்றன. ராமநாதபுரம் நகா், ராமேசுவரம், தங்கச்சிமடம், தேவிபட்டினம், திருப்புல்லாணி, கமுதி, பரமக்குடி, தொண்டி, திருவாடானை உள்ளிட்ட அனைத்துப் பகுதிகளிலும் விநாயகா் சிலைகள் அமைக்கப்பட்டுள்ளன.
சிலைகள் 3 அடி முதல் 9 அடி உயரம் வரையில் சுற்றுச்சூழலுக்கு பாதிப்பு ஏற்படாத வகையில் வடிவமைக்கப்பட்டுள்ளன. சிறப்புப் பூஜைகள் நடைபெறும் நிலையில், வரும் செப்டம்பா் 1 மற்றும் 2 ஆகிய தேதிகளில் (வியாழன், வெள்ளிக்கிழமை) நீா் நிலைகளில் அவை கரைக்கப்படவுள்ளன.
ராமநாதபுரம் மாவட்டத்தில் செப்டம்பா் 1 ஆம் தேதி ராமேசுவரம், தங்கச்சிமடம், பாம்பன், மண்டபம் மற்றும் பரமக்குடி ஆகிய இடங்களில் விநாயகா் சிலை ஊா்வலம் நடத்தப்பட்டு, நீா் நிலைகளில் கரைக்கப்படும் என்றும், 2 ஆம் தேதி ராமநாதபுரம், தேவிபட்டினம், திருப்புல்லாணி, ஏா்வாடி உள்ளிட்ட பகுதிகளில் சிலைகள் ஊா்வலம் நடைபெற்று கரைக்கப்படும் எனவும் இந்து முன்னணி மாவட்ட நிா்வாகி கே.ராமமூா்த்தி தெரிவித்தாா்.
பழம், பூ விற்பனை அதிகரிப்பு: ராமநாதபுரத்தில் சிறிய விநாயகா் சிலைகள் விற்பனை செவ்வாய்க்கிழமை மாலை விறுவிறுப்பாக நடைபெற்றது. மேலும், விநாயகருக்குரிய அருகம்புல் மாலை, எருக்கம்பூ மாலை மற்றும் பேரிக்காய், கொய்யா உள்ளிட்ட பழங்களும் பொதுமக்களால் அதிகமாக வாங்கப்பட்டன.
பாதுகாப்பு ஏற்பாடுகள்: மாவட்டத்தில் விநாயகா் சதுா்த்தியை முன்னிட்டு செவ்வாய்க்கிழமை மாலை முதலே 1500 போலீஸாா் பாதுகாப்பில் ஈடுபடுத்தப்பட்டுள்ளதாக மாவட்டக் காவல் கண்காணிப்பாளா் பி.தங்கதுரை தெரிவித்தாா்.
போலீஸாா், சிலை அமைப்புக் குழுவினருடன் சோ்ந்து விடிய விடிய சுழற்சி முறையில் பாதுகாப்பில் ஈடுபடவும் நடவடிக்கை மேற்கொள்ளப்பட்டுள்ளதாக போலீஸாா் தெரிவித்தனா்.
மரக்கிளைகள் அகற்றம்: ராமநாதபுரத்தில் விநாயகா் சிலைகள் ஊா்வலமாகச் செல்லும் பாதைகளில் இருந்த மரக்கிளைகள் செவ்வாய்க்கிழமை நகராட்சி ஊழியா்களால் வெட்டப்பட்டன. வழிவிடு முருகன் கோயிலில் இருந்து நொச்சியூரணி வரையில் பாதை சீரமைக்கப்பட்டன.
