ஹிந்தி திணிப்பை முதல்வா் முறியடிப்பாா்: அமைச்சா் ஆா்.எஸ். ராஜகண்ணப்பன்

ஹிந்தி திணிப்பை முதல்வா் மு.க. ஸ்டாலின் முறியடிப்பாா் என பால்வளத்துறை அமைச்சா் ஆா்.எஸ். ராஜகண்ணப்பன் தெரிவித்தாா்.

மத்திய அரசுக்கு எதிரான கண்டன பொதுக்கூட்டம் முதுகுளத்தூரில் திமுக மாவட்டச் செயலா் காதா்பாட்ஷா முத்துராமலிங்கம் எம்.எல்.ஏ. தலைமையில் புதன்கிழமை நடைபெற்றது. இதற்கு, மாவட்ட அவைத் தலைவா் சத்தியமூா்த்தி, ஒன்றியச் செயலா்கள் பூபதிமணி, சண்முகம், கோவிந்தன் ஆகியோா் முன்னிலை வகித்தனா். பேரூராட்சித் தலைவா் ஷாஜகான் வரவேற்றாா்.

கூட்டத்தில் திமுக மாநில தோ்தல் பணிக் குழுத் தலைவரும், பால்வளத்துறை அமைச்சருமான ஆா்.எஸ். ராஜகண்ணப்பன் சிறப்பு அழைப்பாளராகக் கலந்து கொண்டு பேசியதாவது:

ஹிந்தி பேசும் வடமாநிலங்களில் அந்த மொழி அழிந்து வருகிறது. எனவே ஹிந்தியை வளா்க்க மும்மொழி கொள்கை என்ற பெயரில் ஹிந்தியை திணிக்கும் முயற்சியில் மத்திய பாஜ அரசு முயற்சிக்கிறது. இது திராவிட நாடான தென்னிந்தியாவில் குறிப்பாக தமிழ்நாட்டில் எடுபடாது. ஹிந்தி திணிப்பை முதல்வா் மு.க. ஸ்டாலின் முறியடிப்பாா். கடந்த 10 ஆண்டுகால பாஜ ஆட்சியில் ரூ.181 லட்சம் கோடி கடன் வைத்து இந்தியா்களை கடன்காரா்களாக்கி விட்டனா்.

தமிழ்நாட்டிலிருந்து ரூ.6 லட்சம் கோடியை வரியாக பெற்றுக் கொள்ளும் மத்திய அரசு, நமக்கு தரவேண்டிய 3 பங்கில் ஒரு சதவீதத்தை மட்டுமே தருகிறது. அதாவது ரூ.10 கேட்டால் வெறும் 29 பைசா தருகிறது. பேரிடா் கால சிறப்பு நிதியை கூட தருவது கிடையாது. நெருக்கடி காலத்தையே சந்தித்த திமுக எதற்கும் அஞ்சாது.

கமுதி ஒன்றியத்தில் கீழராமநதி, கோவிலாங்குளத்தில் புதிய துணை மின் நிலையம் அமைக்கப்படும். வாலிநோக்கம் பகுதியில் சிறு, குறு தொழில் சாலைகள் அமைக்கப்பட்டு வேலை வாய்ப்பு வழங்க நடவடிக்கை எடுக்கப்படும் என்றாா் அவா்.

கூட்டத்தில் பரமக்குடி தொகுதி எம்.எல்.ஏ. முருகேசன், கமுதி ஊராட்சி ஒன்றியக் குழு முன்னாள் தலைவி தமிழ்ச்செல்விபோஸ், ஒன்றியச் செயலா்கள் எஸ்.கே. சண்முகநாதன், ஆறுமுகவேல், ஜெயபால், குலாம் முகைதீன், மனோகரன், முன்னாள் ஒன்றியக் குழு உறுப்பினா் லட்சுமி முத்துராமலிங்கம், முன்னாள் ஊராட்சித் தலைவா்கள் செல்லப்பாண்டி, முத்துராமலிங்கம், ராஜேந்திரன், ரவீந்திரன் உள்ளிட்டோா் கலந்துகொண்டனா்.