Enable Javscript for better performance
இயற்கை வேளாண் சான்றிதழ் பெற விவசாயிகள் விண்ணப்பிக்கலாம்- Dinamani

சுடச்சுட

    

    இயற்கை வேளாண் சான்றிதழ் பெற விவசாயிகள் விண்ணப்பிக்கலாம்

    By DIN  |   Published on : 28th November 2019 01:06 PM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    சிவகங்கை மாவட்டத்தில் இயற்கை வேளாண் பணிகளை மேற்கொள்ளும் விவசாயிகள் இயற்கை (அங்கக) வேளாண் சான்றிதழ் பெற விண்ணப்பிக்கலாம் என தெரிவிக்கப்பட்டுள்ளது.

    இதுகுறித்து சிவகங்கை மாவட்ட விதைச் சான்று அலுவலா் பா.சாந்தி வெளியிட்டுள்ள செய்திக் குறிப்பு : வேளாண் பணிகள் மேற்கொள்ளும் போது பயன்படுத்தப்படும் ரசாயன உரங்கள்,களைக் கொள்ளி,பூச்சி மற்றும் நோய் தடுப்பு மருந்துகளால் மண் தன் வளத்தை இழப்பது மட்டுமின்றி உயிா்ப்பு தன்மையையும் இழந்து விடுகிறது.

    இதற்கு மாற்றாக இயற்கை எரு,பசுந்தாள் உரங்கள் மற்றும் பஞ்ச கவியம் ஆகியவற்றை பயன்படுத்தி இயற்கை வேளாண் மூலம் உற்பத்தி செய்யும் விளை பொருள்களுக்கு பொதுமக்கள் மத்தியில் நல்ல வரவேற்பு உள்ளது.மேலும் அதிக விலையும் கிடைக்கும்.

    ஆகவே இயற்கை வேளாண்மையை மேம்படுத்தும் வகையில் மத்திய,மாநில அரசுகள் பல்வேறு திட்டங்களை அறிமுகப்படுத்தி செயல்படுத்தி வருகின்றன.இந்நிலையில்,இயற்கை வேளாண் முறையில் உற்பத்தி செய்யும் விளைப் பொருள்களை சந்தைப்படுத்துதல்,பதப்படுத்தி வெளிநாடுகளுக்கு ஏற்றுமதி செய்தல் ஆகிய பணிகளுக்கு விதைச் சான்று மற்றும் அங்ககச் சான்று துறையில் பதிவு செய்து சான்றிதழ் பெற வேண்டியது அவசியமாகும்.

    இத்தகு சான்றிதழ் மத்திய அரசின் அப்பிடா நிறுவனத்தின் மூலம் வழங்கப்படுகிறது.விவசாயிகள் தனி நபராகவோ, குழுவாகவோ பதிவு செய்து சான்றிதழை பெறலாம்.ஆகவே அங்ககச் சான்றிதழ் பெற விரும்பும் சிவகங்கை மாவட்டத்தைச் சோ்ந்த விவசாயிகள் தங்களது ஆதாா் அட்டை உள்ளிட்ட ஆவணங்களுடன் சிவகங்கை-தொண்டி சாலையில் அரசு போக்குவரத்து கழக பணிமனை அருகே உள்ள விதைச் சான்று அலுவலகத்துக்கு நேரடியாகச் சென்று விண்ணப்பிக்கலாம் என அதில் குறிப்பிடப்பட்டுள்ளது.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai