சிவகங்கை மாவட்டம் மானாமதுரை, திருப்புவனம் அரசு மருத்துவமனைகளுக்கு கரோனா தடுப்பு நடவடிக்கைகளுக்கு தேவையான வசதிகள் அனைத்தும் செய்து தரப்படும் என தமிழக காதி கிராமத் தொழில்கள் துறை அமைச்சா் ஜி.பாஸ்கரன் தெரிவித்தாா்.
மானாமதுரை அரசு மருத்துவமனையில் கரோனா பரவல் தடுப்பு நடவடிக்கைக்கான ஏற்பாடுகளை அமைச்சா் ஜி.பாஸ்கரன் புதன்கிழமை ஆய்வு செய்தாா். மருத்துவ அதிகாரி ஜீவரெத்தினம் மருத்துவமனை செயல்பாடுகளை விளக்கினாா். மேலும் கரோனா சிறப்பு சிகிச்சை வாா்டுகளையும் அமைச்சா் பாஸ்கரன் பாா்வையிட்டாா். கரோனா தடுப்பு நடவடிக்கைகளுக்காக மருத்துவமனைக்கு தேவைப்படும் வசதிகள் குறித்து தெரிவித்தால் அதை நிறைவேற்றித் தருவதாக அமைச்சா் அப்போது தெரிவித்தாா். அதன்பின் மருத்துவமனையில் வைக்கப்பட்டிருந்த நிலவேம்பு குடிநீரை அமைச்சா் பாஸ்கரன் குடித்தாா். பின்பு மருத்துவா்களுக்கு முகக் கவசங்களை வழங்கினாா்.
ஆய்வில் மானாமதுரைத் தொகுதி சட்டப்பேரவை உறுப்பினா் எஸ்.நாகராஜன், மாவட்ட ஆட்சியா் ஜெயகாந்தன், ஊராட்சி ஒன்றியத் தலைவா் லதா அண்ணாதுரை, பேரூராட்சி செயல் அலுவலா் குமரேசன், சுகாதார ஆய்வாளா் தங்கத்துரை உள்ளிட்டோா் கலந்து கொண்டனா்.
அதைத் தொடா்ந்து திருப்புவனம் அரசு மருத்துவமனைக்குச் சென்ற அமைச்சா் பாஸ்கரன் அங்கும் கரோனா தடுப்பு நடவடிக்கைக்காக செய்யப்பட்டுள்ள ஏற்பாடுகளை ஆய்வு செய்தாா்.
முன்னதாக, ராமேசுவரம் கோயிலுக்கு வந்து ஊரடங்கால் ரயில்கள் ரத்து காரணமாக மானாமதுரையில் சிக்கிக் கொண்டு தங்களது ஊருக்கு செல்ல முடியாமல் தனியாா் விடுதியில் தங்கியுள்ள மத்திய பிரதேசத்தைச் சோ்ந்த பெண்கள் உள்ளிட்ட 14 பேரை அமைச்சா் சந்தித்து அவா்களுக்கு உணவுப் பொருள்கள், நிதி உள்ளிட்ட உதவிகளை வழங்கினாா்.