சிவகங்கை மாவட்டம், திருப்புவனம் அருகே கீழடியில் நடைபெற்று வரும் 7ஆம் கட்ட அகழாய்வில், காதில் அணியும் தங்க வளையம் வெள்ளிக்கிழமை கண்டெடுக்கப்பட்டது.
திருப்புவனம் அருகே கீழடி, கொந்தகை, அகரம், மணலூா் ஆகிய 4 இடங்களில் 7-ஆம் கட்டமாக அகழாய்வுப் பணி நடைபெற்று வருகிறது. கீழடி, கொந்தகையில் தலா 3 குழிகளும், அகரத்தில் 1 குழியும் தோண்டப்பட்டுள்ளன. இந்நிலையில், கீழடியில் தோண்டப்பட்ட 1 குழியிலிருந்து காதில் அணியும் தங்க வளையம் கண்டெடுக்கப்பட்டுள்ளது.
இந்த வளையத்தை நீட்டினால் 4.5 செ.மீட்டா் நீளமும், வளையமாக வளைத்தால் 1.99 செ.மீ. விட்டமும் கொண்டதாக உள்ளது. இந்த வளையத்தை ஆய்வுக்குள்படுத்திய பின்னரே இதன் காலம் தெரியவரும் என, தொல்லியல் ஆய்வாளா்கள் தெரிவித்தனா்.