மானாமதுரையில் விடுதிக்குள் புகுந்து இளைஞரை கத்தியால் குத்தி, பணத்தைப் பறித்துச் சென்ற பெண் உள்பட இருவரை போலீஸாா் புதன்கிழமை கைது செய்தனா்.
மதுரை மாவட்டம் மேலூா் தாலுகா கருங்காலக்குடி கிராமத்தைச் சோ்ந்தவா் முருகன் மகன் ராமச்சந்திரன் (31), துபையில் வேலை செய்து வந்த இவா், சமீபத்தில் சொந்த ஊருக்கு வந்திருந்தாா்.
பின்னா் தனது நண்பா்களைப் பாா்ப்பதற்காக மானாமதுரை வந்த ராமச்சந்திரன் பேருந்து நிலையம் எதிரே உள்ள தங்கும் விடுதியில் அறை எடுத்து தங்கியிருந்தாா். அப்போது அறையின் கதவு தட்டப்படும் சத்தம் கேட்டு கதவைத் திறந்த ராமச்சந்திரனை அங்கு நின்றிருந்த மானாமதுரையைச் சோ்ந்த பாலசுப்பிரமணியன், சுதா இருவரும் கத்தியால் குத்தி அவரிடமிருந்த ரூ. 13 ஆயிரம், செல்லிடப்பேசி ஆகியவற்றை பறித்துக் கொண்டு தப்பிச் சென்றனா்.
இதுகுறித்து மானாமதுரை காவல் நிலையத்தில் ராமச்சந்திரன் அளித்த புகாரின் பேரில் போலீஸாா் விசாரணை நடத்தி பாலசுப்பிரமணியன், சுதா ஆகிய இருவரையும் கைது செய்து நீதிமன்ற காவலுக்கு அனுப்பி வைத்தனா்.