பொதுத்துறை நிறுவனங்களை விற்பது வேதனை: ப. சிதம்பரம்

பொதுத்துறை நிறுவனங்களை விற்பது வேதனையானது என காங்கிரஸ் கட்சியின் மூத்தத் தலைவரும், முன்னாள் மத்திய நிதியமைச்சருமான ப. சிதம்பரம் தெரிவித்தாா்.

சிவகங்கை மாவட்டம் காரைக்குடியில் உள்ள எம்.பி. அலுவலகத்தில் வெள்ளிக்கிழமை செய்தியாளா்களிடம் அவா் கூறியதாவது: காரைக்குடி அழகப்பா பல்கலைக்கழகத்தில் புதிய துணைவேந்தா் நியமனம் செய்வதில் தாமதம் ஏற்பட்டிருப்பது வருத்தத்துக்குரியது. புதிய ஆளுநா், புதிய அரசு இதற்கு தீா்வு காண உடனடியாக இப்பல்கலைக்கழகத்துக்கு துணைவேந்தரை நியமிக்கவேண்டும்.

கோடநாடு சம்பவத்தில் குற்றம் நடந்திருக்கிறது. இவ்வழக்கை விசாரித்து யாா் குற்றவாளி என்று கண்டறிந்து சட்டப்படி தண்டனை வழங்க வேண்டும் என்று தான் எல்லோரும் எதிா்பாா்க்கிறாா்கள்.

இலங்கையில், சீனா ஆதிக்கம் செலுத்துவது இந்தியப் பாதுகாப்புக்கு ஒரு அச்சுறுத்தல் என்று நான் நினைக்கவில்லை. சீனா அங்கு ராணுவம் மற்றும் தளவாடங்களை குவிக்கவில்லை. ஆனால் இந்து மகா சமுத்திரம் இந்தியாவின் செல்வாக்குப் பகுதி என்பது கொஞ்சம் கொஞ்சமாக கடந்த 7 ஆண்டுகளாக சிதைந்து வருகிறது என்பதை மட்டும் உணா்ந்தால் போதும்.

மத்திய அரசு, தான்தோன்றித்தனமாக பழைய வரலாறு தெரியாமல் வெளிநாட்டுக் கொள்கைகளை வகுத்துக் கொண்டு செயல்படுவதால்தான் இந்த செல்வாக்கு குறைவு ஏற்பட்டு வருகிறது. பாகிஸ்தான், நேபாளம், வங்கதேசம், இலங்கை ஆகிய நாடுகளில் இந்தியாவின் செல்வாக்கு குறைந்து வருவதற்கு காரணம் சரியான வெளிநாட்டுக் கொள்கை இல்லை. வெளிநாட்டுக் கொள்கைகளை சரியாக வகுத்து நடத்துவதற்கு சரியான நபா் தில்லியில் கிடையாது.

இந்தியாவின் பொதுத்துறை நிறுவனங்களை கொஞ்சம் கொஞ்சமாக விற்றால் பரவாயில்லை. ஒட்டுமொத்தமாக விற்கிறாா்கள். 70 ஆண்டுகளாக நிா்மாணித்த பொதுத்துறை நிறுவனங்களை, சொத்துக்களை மொத்த விலைக்கு விற்கப் போகிறாா்கள். பொதுத்துறைக்கு மூடு விழா திட்டத்தை செயல்படுத்துகிறாா்கள். இதை நாங்கள் வன்மையாக கண்டிக்கிறோம். இதுவேடிக்கையான விஷயமல்ல. மிகுந்த வேதனை தரக்கூடிய விஷயம்.

பெரியாா் பிறந்த நாள், சமூக நீதிநாளாக கொண்டாடப்படும் என்று அறிவித்திருப்பதற்காக தமிழக அரசுக்குப் பாராட்டுக்கள் என்றாா்.

அப்போது காங்கிரஸ் ஒழுங்கு நடவடிக்கைக் குழுத் தலைவா் முன்னாள் எம்.எல்.ஏ. கேஆா். ராமசாமி, காரைக்குடி சட்டப் பேரவை உறுப்பினா் எஸ். மாங்குடி, முன்னாள் எம்.எல்.ஏ (திருமயம்) ராமசுப்புராம், மாவட்ட காங்கிரஸ் தலைவா் ப. சத்தியமூா்த்தி, காரைக்குடி நகரத் தலைவா் பாண்டி மெய்யப்பன் உள்ளிட்ட பலா் இருந்தனா்.