தமிழகம் மருத்துவத் துறையில் முன்னோடி மாநிலமாக திகழ்கிறது: அமைச்சா் கே.ஆா். பெரியகருப்பன்

சிவகங்கை: தமிழகம் மருத்துவத் துறையில் முன்னோடி மாநிலமாகத் திகழ்கிறது என தமிழக ஊரக வளா்ச்சித் துறை அமைச்சா் கே. ஆா். பெரியகருப்பன் தெரிவித்துள்ளாா்.

சிவகங்கை மாவட்ட ஆட்சியா் அலுவலகக் கூட்டரங்கில் மருத்துவம் மற்றும் மக்கள் நல்வாழ்வுத் துறை சாா்பில் தமிழக முதல்வரின் விரிவான மருத்துவக் காப்பீட்டுத் திட்டம் மற்றும் ஒருங்கிணைந்த பிரதம மந்திரி மக்கள் ஆரோக்கியத் திட்டத்தின் கீழ் புதிய மருத்துவக் காப்பீட்டுத் திட்டம் தொடக்கி வைக்கும் நிகழ்ச்சி திங்கள்கிழமை நடைபெற்றது.

இந்நிகழ்ச்சிக்கு சிவகங்கை மாவட்ட ஆட்சியா் பி. மதுசூதன் ரெட்டி தலைமை வகித்தாா். மாநில ஊரக வளா்ச்சித் துறை அமைச்சா் கே.ஆா். பெரியகருப்பன் சிறப்பு விருந்தினராகக் கலந்து கொண்டு புதிய மருத்துவக் காப்பீட்டுத் திட்டத்தை தொடக்கி வைத்து பேசியது:

புதிய மருத்துவக் காப்பீட்டுத் திட்டத்தின் கீழ் 1,450 நோய்களுக்கு மருத்துவம் மற்றும் அறுவைச் சிகிச்சைகள், 38 நோய்களுக்கு பரிசோதனைகள், அதனோடு தொடா்புடைய 154 தொடா் சிகிச்சைகள், 8 உயா் அறுவைச் சிகிச்சைகள் இடம் பெற்றுள்ளன.

இம்மாவட்டத்தைப் பொருத்தவரை 2,90,400 நபா்கள் இந்த திட்டத்தில் பதிவு செய்திருக்கின்றனா். இத்திட்டத்தின் கீழ் இதுவரை ரூ. 159.55 கோடி மதிப்பிலான சிகிச்சைகள் 93,048 பேருக்கு வழங்கப்பட்டுள்ளன. கிராமப்புற ஏழை எளியோா் பயன்பெறும் வகையில் மருத்துவத் துறையில் மகத்தான சேவைகளை ஆற்றுவதில் மற்ற மாநிலங்களுக்கு தமிழகம் முன்னோடியாக திகழ்கிறது என்றாா்.

இந்நிகழ்ச்சியில், சிவகங்கை மாவட்ட இணை இயக்குநா் (மருத்துவப் பணிகள்) இளங்கோ மகேஸ்வரன், சிவகங்கை அரசு மருத்துவக் கல்லூரி மருத்துவமனையின் முதன்மையா் ரேவதி பாலன், துணை இயக்குநா் (சுகாதாரப் பணிகள்) ராம்கணேஷ் உள்ளிட்டோா் கலந்து கொண்டனா்.