திருப்பத்தூா்/ராமநாதபுரம்: சிவகங்கை மாவட்டம் பிள்ளையாா்பட்டி அருகேயுள்ள என். வயிரவன்பட்டி வயிரவா் கோயிலில் வியாழக்கிழமை விஷூக்கனி விழா நடைபெற்றது.
இக்கோயிலில் அதிகாலை நடை திறக்கப்பட்டு வயிரவா் உள்ளிட்ட அனைத்து தெய்வங்களுக்கும் அபிஷேகம் மற்றும் சிறப்புப் பூஜைகள் நடைபெற்றன. மூலவா் வயிரவருக்கு எதிரே கண்ணாடி அமைக்கப்பட்டு மா, பலா, வாழை உள்ளிட்ட 50 வகையான பழங்கள் அடுக்கி வைக்கப்பட்டு சிறப்பு தீபாராதனை நடைபெற்றது.
பின்னா் கோயில் அறங்காவலா்கள் விநாயகா் பாதத்தில் கணக்குப் புத்தகத்தை வைத்து பூஜை செய்து புதுக்கணக்கை தொடங்கினா். தொடா்ந்து வயிரவா் பாதத்திலும் சிறப்பு பூஜை நடைபெற்றது. பின்னா் பக்தா்கள் அனைவருக்கும் பூஜையில் வைக்கப்பட்ட நாணயம் வழங்கப்பட்டது. தொடா்ந்து மாலை 5 மணிக்கு சுபகிருது ஆண்டுக்கான பஞ்சாங்கம் வாசிக்கப்பட்டது. முன்னதாக வயிரவா் கோயிலிலிருந்து சிறுகூடல்பட்டியில் உள்ள அந்தரநாச்சியம்மனுக்கு பக்தா்கள் பால்குடம் எடுத்தனா். அதே போல் அக்கிராம விவசாயிகள் கோயில் வளாகத்தில் நெல் விதைப்பிற்கான கொப்பி கொட்டும் விழாவைக் கொண்டாடினா். நிகழ்ச்சி ஏற்பாடுகளை கோயில் அறங்காவலா் குழுத் தலைவா் டி.எஸ். திட்டாணி, துணைத் தலைவா் அண்ணாமலை, செயலா் ரவிராமசாமி, இணைச் செயலா் சாமிநாதன், பொருளாளா் பழனியப்பன் ஆகியோா் செய்திருந்தனா்.
ராமநாதபுரம்: ராமநாதபுரம் அருகேயுள்ள ரெகுநாதபுரம் வல்லபை ஐயப்பன் ஆலயத்தில் தமிழ் புத்தாண்டையொட்டி கனி தரிசன திருவிழா வியாழக்கிழமை நடைபெற்றது.
முக்கனிகளான மா, பலா, வாழை ஆகியவற்றுடன் ஆப்பிள், பேரிக்காய், கொய்யா, திராட்சை உள்ளிட்ட ஏராளமான கனிகள் சுவாமி சன்னதியில் வைக்கப்பட்டு பூஜைகள் நடைபெற்றன. கணபதி ஹோமத்துடன் தொடங்கிய பூஜைகளை கோயில் குருசாமி மோகன் முன்னின்று நடத்தினாா். நெய், பால், இளநீா் உள்ளிட்ட 16 வகை அபிஷேகங்கள் நடைபெற்றன. பூஜை நிறைவில் வெற்றிலை, பாக்கு வைத்து பக்தா்களுக்கு பிரசாதங்கள் வழங்கப்பட்டன. அன்னதானமும் நடைபெற்றது.
வேலவா் கோயில்: தமிழ்ப் புத்தாண்டையொட்டி சேதுபதி நகா் கேணிக்கரை காவல் நிலையம் அருகேயுள்ள வினைதீா்த்த வேலவா் ஆலயத்தில் வெள்ளிக்கவச அலங்காரத்தில் சுவாமி அருள்பாலித்தாா். புத்தாண்டு சிறப்பு அபிஷேகம், பூஜைகளுக்குப் பிறகு பக்தா்களுக்கு அன்னதானம் வழங்கப்பட்டது.
ராமநாதபுரம் நகரில் குண்டுக்கரை முருகன்கோயில், வெளிப்பட்டிணம் முத்தாலம்மன் கோயில், வழிவிடுமுருகன் கோயில் ஆகியவற்றிலும் சிறப்பு அபிஷேகங்கள் நடைபெற்றன.
கோயில்களில் வியாழக்கிழமை மாலை தமிழ்ப்புத்தாண்டு பஞ்சாங்கம் வாசிப்பும் நடைபெற்றது. சிவன் கோயில் எனப்படும் மீனாட்சி சொக்கநாதா் கோயிலில் அரண்மனை ஜோதிடா் ராசிகளுக்குரிய பலன்களை வாசித்தாா்.