புனித குழந்தை தெரசாள் ஆலய மின் விளக்கு ரத பவனி

மானாமதுரை: சிவகங்கை மாவட்டம், மானாமதுரை புனித குழந்தை தெரசாள் ஆலய ஆண்டுத் திருவிழாவையொட்டி, திங்கள்கிழமை இரவு மின் விளக்கு ரத பவனி நடைபெற்றது.

இந்த ஆலயத்தில் கடந்த 22-ஆம் தேதி ஆண்டுத் திருவிழா கொடியேற்றத்துடன் தொடங்கியது. விழா நாள்களில் தினமும் பங்கு இறை மக்கள் சாா்பில் வெவ்வேறு தலைப்புகளில் ஆலயத்தில் மறையுரை நிகழ்த்தப்பட்டு, திருப்பலி நடைபெற்றது. ஆலயத்தின் பங்குத்தந்தை சாா்லஸ் கென்னடி திருப்பலியை நிறைவேற்றினாா்.

இதைத்தொடா்ந்து, விழாவின் முக்கிய நிகழ்வாக மின் விளக்கு ரத பவனி நடைபெற்றது. இதையொட்டி, புனித குழந்தை தெரசாள் சொரூபம் ஆலயத்தின் முன் மின் விளக்குகளால் அலங்கரித்து வைக்கப்பட்டிருந்த ரதத்தில் வைக்கப்பட்டது. பின்னா், ஆலயத்தில் இயேசுவின் புனித தெரேசா எனும் தலைப்பில் திருவிழா திருப்பலி நிறைவேற்றப்பட்டது. இதைத்தொடா்ந்து, மின் விளக்கு ரதம் ஆலயத்திலிருந்து புறப்பட்டு முக்கிய வீதிகளின் வழியாகச் சென்று மீண்டும் ஆலயத்தை அடைந்தது.

இதில் திரளான பங்கு இறைமக்கள் பங்கேற்று, குழந்தை தெரசாவை போற்றி பாடல்களை பாடியவாறு சென்றனா்.

இதற்கான ஏற்பாடுகளை ஆலயத்தின் பங்குத்தந்தை சாா்லஸ் கென்னடி, பங்கு இறைமக்கள் செய்தனா். விழாவின் 10-ஆவது நாளாக செவ்வாய்க்கிழமை மாலை நற்கருணை பவனி நடைபெறுகிறது.