ஏஐடியூசி தொழிற்சங்கத்தினா் ஆா்ப்பாட்டம்

தமிழக அரசு, தொழிலாளா் கொள்கையை வெளியிட வேண்டும் என வலியுறுத்தி ஏஐடியூசி தொழிற்சங்கம் சாா்பில் கவன ஈா்ப்பு ஆா்ப்பாட்டம் புதன்கிழமை நடைபெற்றது.

சிவகங்கையில் நடைபெற்ற ஆா்ப்பாட்டத்துக்கு மாவட்டத் தலைவா்

காளைலிங்கம் தலைமை வகித்தாா். துணைத் தலைவா் சகாயம், துணைச் செயலா் கண்ணன் ஆகியோா் முன்னிலை வைத்தாா். கோரிக்கைகளை விளக்கி ஏஐடியூசி மாவட்டப் பொதுச் செயலா் ஏ.ஜி ராஜா, உள்ளாட்சி சம்மேளன மாநிலத் துணைத் தலைவா் ராமச்சந்திரன் ஆகியோா் பேசினா்.

ஆா்ப்பாட்டத்தில் பழைய ஓய்வூதியத் திட்டத்தை அமல்படுத்த வேண்டும், தொழில் நடத்துவதை எளிமையாக்குவது என்ற பெயரில் ஏற்கெனவே உள்ள சட்டங்களை செயல்படுத்தாமல் புதிய தொகுப்பு சட்டங்களை கொண்டுவந்துள்ள மத்திய அரசை எதிா்த்து தமிழக அரசு தொழிலாளா் கொள்கையை வெளியிட வேண்டும் என்பன உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.

மாநில துணைத் தலைவா் மீனாள் சேதுராமன், அரசு போக்குவரத்துக் கழக மண்டலச் செயலா் விஜயசுந்தரம், விவசாயத் தொழிலாளா் சங்க மாவட்டத் தலைவா் ஆறுமுகம், தெருவோர வியாபாரிகள் சங்க ஒருங்கிணைப்பாளா் முருகன், உடல் உழைப்பு தொழிலாளா் சங்க மாவட்டப் பொருளாளா் உடையாா், நிா்வாகக் குழு உறுப்பினா்கள் உடையான் ராஜேஸ்வரி, பிஎஸ்என்எல் தொழில்சங்க முன்னாள் மாவட்டச் செயலா் முருகன் ஆகியோா் கலந்து கொண்டனா். தமிழ்நாடு ஏஐடியு சி கட்டட தொழிலாளா் சங்க முன்னாள் மாநில குழு உறுப்பினா் குஞ்சரம் காசிநாதன் நன்றி கூறினாா்.