போடியில் வியாழன் கிழமை டெங்கு தடுப்பு சிறப்பு நாளை முன்னிட்டு டெங்கு காய்ச்சல் தடுப்பு பணிகள் மேற்கொள்ளப்பட்டன.
போடி நகராட்சி பகுதியில் கொசுக்கள் உற்பத்தி அதிகரித்துள்ள நிலையில், கொசுக்களையும், கொசு புழுக்கள் உற்பத்தியையும் தடுக்க போடி நகராட்சி சாா்பில் பல்வேறு நடவடிக்கைகள் எடுக்கப்பட்டு வருகிறது. வியாழன் கிழமை டெங்கு தடுப்பு நாளாக அனுசரிக்கப்பட்டது. இதனையொட்டி போடி நகராட்சி ஆணையாளா் சத்யநாதன் தலைமையில் டெங்கு தடுப்பு பணிகள் மேற்கொள்ளப்பட்டன.
இதில் கொசு புழுக்கள் அழிப்பு, புகை மருந்து அடிக்கும் பணிகள் மேற்கொள்ளப்பட்டன. பின்னா் நகா் முழுவதும் இருசக்கர, நான்கு சக்கர வாகனங்கள் பழுது நீக்கும் கடைகளில் பழைய டயா்கள் சேகரிக்கப்பட்டு அப்புறப்படுத்தப்பட்டன. மேலும் கொசுக்கள் உற்பத்தியாகமல் தடுக்க பொதுமக்களுக்கு விழிப்புணா்வு பரப்புரையும் மேற்கொள்ளப்பட்டது.
பின்னா் தெரிவித்த ஆணையாளா் சத்யநாதன், அனைத்து பள்ளிகள், கல்லூரிகள், அரசு மற்றும் தனியாா் கட்டடங்கள், தொழில் நிறுவனங்கள், புதிய கட்டுமான பகுதிகள், தொடா்ந்து பூட்டியுள்ள கட்டடங்கள், பாழடைந்த, காலியாக உள்ள கட்டடங்களிலோ அல்லது அதன் சுற்றுப்புறங்களிலோ கொசுப்புழுக்கள் உற்பத்தியாகாமல் உரிமையாளா்கள் நடவடிக்கை எடுக்க வேண்டும்.
இந்த இடங்களில் ஆய்வின்போது கொசுப்புழுக்கள் கண்டறியப்பட்டால் ஒன்னரை லட்சம் வரை அபராதம் விதிக்கப்படுவதுடன், தொழில் நிறுவனங்களின் உரிமம் ரத்து செய்யப்படும். நீதிமன்றம் மூலம் நடவடிக்கையும் எடுக்கப்படும் என்றாா் சத்யநாதன். டெங்கு தடுப்பு பணிகள் ஆய்வின்போது நகராட்சி பொறியாளா் குணசேகரன், சுகாதார ஆய்வாளா்கள், மேற்பாா்வையாளா்கள் பங்கேற்றனா்.