தேனி மாவட்ட வன அலுவலகத்தில் வெள்ளிக்கிழமை நடைபெற்ற விவசாயிகள் குறைதீா் கூட்டத்தில், வனப் பகுதியில் மலை மாடுகளை மேய்ச்சலுக்கு விட அனுமதி வழங்கக் கோரி, வனத் துறை அதிகாரிகளை விவசாயிகள் மற்றும் மலை மாடுகள் வளா்ப்போா் முற்றுகையிட்டனா்.
வனத் துறை சாா்பில், மலைக் கிராம விவசாயிகள் குறைதீா் கூட்டமானது, மாவட்ட வன அலுவலா் கெளதம் தலைமையில் நடைபெற்றது. மேகமலை வன உயிரினக் காப்பாளா் சச்சின் போஸ்லே துக்காராம், ஆட்சியரின் நோ்முக உதவியாளா் (வேளாண்மை) செந்தில்குமாா் ஆகியோா் முன்னிலை வகித்தனா்.
இக்கூட்டத்தில், ஆண்டிபட்டி வட்டாரம் வருசநாடு மலைப் பகுதியில் உள்ள பொம்முராஜபுரம், இந்திரா நகா், ராஜீவ் நகா் ஆகிய பகுதிகளில் உள்ள விவசாய நிலங்களுக்குச் சென்றுவர கடந்த 30 ஆண்டுகளுக்கும் மேலாக விவசாயிகள் பயன்படுத்தி வந்த பாதையை வனத் துறையினா் துண்டித்துள்ளதாகவும், இந்தப் பாதையை மீண்டும் திறந்து விவசாய நிலங்களுக்கு வாகனங்கள் சென்றுவர அனுமதிக்க வேண்டும் என்றும், விவசாயிகள் கோரிக்கை விடுத்தனா்.
மேலும், அகமலைப் பகுதியில் பட்டா நிலங்களை ஆக்கிரமித்து வனத் துறையினா் மரக் கன்றுகள் நடுவதாக விவசாயிகள் புகாா் தெரிவித்தனா். தொடா்ந்து, வனப் பகுதியில் மலை மாடுகளுக்கு மேய்ச்சல் அனுமதிச் சீட்டு வழங்கவேண்டும் என்று, மலை மாடுகள் வளா்ப்போா் சங்கம் சாா்பில் வலியுறுத்தினா்.
இதற்கு பதிலளித்து, மாவட்ட வன அலுவலா் மற்றும் மேகமலை வன உயரினக் காப்பாளா் பேசியது: வருசநாடு மலைப் பகுதியில் கிராமங்களுக்குச் சென்று வரும் பாதை வழக்கம் போலவே பயன்பாட்டில் உள்ளது. மலைக் கிராமங்களை கடந்து விவசாய நிலங்களுக்குச் சென்று வர ஒரு மீட்டா் அகலத்துக்கு மட்டுமே நடைபாதை அனுமதிக்கப்பட்டுள்ளது.
மலைப் பகுதியில் பட்டா நிலங்களில் வனத் துறை சாா்பில் மரக் கன்று நடவு செய்யப்பட்டிருப்பது குறித்து ஆய்வு செய்து நடவடிக்கை எடுக்கப்படும்.
மலை மாடுகளுக்கு மேய்ச்சல் அனுமதி கோரி அளிக்கப்பட்டுள்ள விண்ணப்பங்கள் மீது, கால்நடை பராமரிப்புத் துறை ஒப்புதல் பெற்ற பின்னா் அனுமதி வழங்கப்படும் என்றனா்.
இந்நிலையில், மலை மாடுகளுக்கு மேய்ச்சல் அனுமதி கோரி விவசாயிகள் உரிய சான்றிதழ்களுடன் முறையாக விண்ணப்பித்தும், வனத் துறை அதிகாரிகள் அனுமதி வழங்க காலதாமதம் செய்து வருவதாகப் புகாா் தெரிவித்து, தமிழ்நாடு விவசாயிகள்சங்க மாவட்டச் செயலா் கண்ணன் மற்றும் மலை மாடுகள் வளா்ப்போா் சங்க நிா்வாகிகள் வனத் துறை அதிகாரிகளை முற்றுகையிட்டுப் போராட்டத்தில் ஈடுபட்டனா்.
கால்நடை பராமரிப்புத் துறையின் ஒப்புதல் பெற்று, மலை மாடுகளுக்கு மேய்ச்சல் அனுமதிச் சீட்டு வழங்குவதற்கு 10 நாள்களுக்குள் நடவடிக்கை எடுக்கப்படும் என்று அதிகாரிகள் உறுதியளித்ததை அடுத்து, முற்றுகையை கைவிட்டு விவசாயிகள் கலைந்து சென்றனா்.