அரசுப் பணியாளா்கள் பணிப் பதிவேட்டை செல்லிடப்பேசி செயலியில் திருத்தலாம்: அரசு முதன்மை செயலா் தகவல்

அரசுப் பணியாளா்கள் தங்களது பணிப் பதிவேடு பதிவுகளை செல்லிடபேசி செயலி மூலம் சரிபாா்த்து திருத்தம் மேற்கொள்ளலாம் என்று அரசு முதன்மைச் செயலா் மற்றும் கருவூல கணக்குத் துறை ஆணையா் சு.ஜவஹா் தெரிவித்தாா்.

தேனி, என்.ஆா்.டி. மக்கள் மன்ற அரங்கில் புதன்கிழமை நடைபெற்ற ஒருங்கிணைந்த நிதி மற்றும் மனித வள மேலாண்மைத் திட்டம் குறித்த ஆய்வுக் கூட்டத்தில் அவா் பேசியது:

மாநிலத்தின் நிதி மேலாண்மை மற்றும் மனித வள மேலாண்மையை ஒருங்கிணைத்து அரசு நிா்வாகத்தை மேம்படுத்துவதற்காக இத் திட்டம் செயல்படுகிறது. இத் திட்டத்தின் மூலம் அரசின் நிதி நிா்வாகம் மற்றும் வரவு, செலவு குறித்த விவரங்களை உடனுக்குடன் துல்லியமாகத் தெரிந்து கொள்ளலாம்.

மாநில கணக்காயா் அலுவலகம், வருமான வரித் துறை, ரிசா்வ் வங்கி, தேசிய மயமாக்கப்பட்ட வங்கிகள் மற்றும் அனைத்து அரசுத் துறைகளை ஒருங்கிணைத்து இத் திட்டம் செயல்படுத்தப்பட்டுள்ளது. இத் திட்டத்தில் அரசுத் துறைகளில் பணியாளா்களுக்கு ஒரே நாளில் சம்பளப் பட்டியல் தயாரித்து, இணையம் மூலம் கருவூலத்தில் சமா்ப்பித்து, சம்பந்தப்பட்ட பணியாளரின் வங்கிக் கணக்கில் சம்பளத் தொகையை வரவு வைக்க முடியும்.

மேலும், அனைத்து அரசுப் பணியாளா்களும் தங்களது பணிப் பதிவேட்டில் மேற்கொள்ளப்பட்டுள்ள பதிவுகளை செல்லிடபேசி செயலி மூலம் பாா்வையிட்டு தெரிந்து கொண்டு, தேவையான திருத்தங்கள் மேற்கொள்ளலாம் என்றாா்.

இந்தக் கூட்டத்தில் மாவட்ட ஆட்சியா் ம.பல்லவி பல்தேவ், அரசு நிதித் துறை துணைச் செயலா் மா.அரவிந்த், மாவட்ட வன அலுவலா் கெளதம் உள்ளிட்டோா் கலந்து கொண்டனா்.