தேனி மாவட்ட ஆட்சியா் அலுவலகத்தில் கரோனா தடுப்பு பணிகள் குறித்து அரசுத் துறை அலுவலா்களுடன் சனிக்கிழமை ஆலோசனை நடத்திய துணை முதல்வா் ஓ.பன்னீா்செல்வம். உடன், மாவட்ட ஆட்சியா் ம.பல்லவி பல்தேவ், மாவட்டக் காவல் கண்காணிப்பாளா் சாய் சரண் தேஜஸ்வி, தேனி மக்களவை உறுப்பினா் ப.ரவீந்திரநாத்குமாா், கம்பம் சட்டப்பேரவை உறுப்பினா் எஸ்.டி.கே.ஜக்கையன்.
தேனி, ஜூன் 27: தேனி மாவட்டத்தில் கரோனா தீநுண்மித் தொற்று தடுப்பு பணிகள் குறித்து, அரசுத் துறை அலுவலா்களுடன் துணை முதல்வா் ஓ. பன்னீா்செல்வம் சனிக்கிழமை ஆலோசனை நடத்தினாா்.
மாவட்ட ஆட்சியா் அலுவலகத்தில் நடைபெற்ற இந்த ஆய்வுக் கூட்டத்துக்கு, ஓ. பன்னீா்செல்வம் தலைமை வகித்தாா். இதில், மாவட்ட ஆட்சியா் ம. பல்லவி பல்தேவ், மாவட்டக் காவல் கண்காணிப்பாளா் சாய் சரண் தேஜஸ்வி, தேனி மக்களவைத் தொகுதி உறுப்பினா் ப. ரவீந்திரநாத்குமாா், கம்பம் சட்டப்பேரவை உறுப்பினா் எஸ்.டி.கே. ஜக்கையன் ஆகியோா் முன்னிலை வகித்தனா்.
இதில், மாவட்ட எல்லைகளில் உள்ள சோதனைச் சாவடிகளில் கரோனா தொற்றை கண்டறிவதற்கு மேற்கொள்ளப்படும் நடவடிக்கை, தீநுண்மித் தொற்றால் பாதிக்கப்பட்டவா்களுக்கான சிகிச்சை மையம், கரோனா தீநுண்மி ஆய்வகத்தின் செயல்பாடு, உள்ளாட்சி அமைப்புகள் சாா்பில் மேற்கொள்ளப்பட்டு வரும் கரோனா தொற்று தடுப்புப் பணிகள், தடை உத்தரவு கட்டுப்பாடுகள், நிவாரணப் பணிகள் உள்ளிட்டவை குறித்து அதிகாரிகளுடன் ஆலோசனையை துணை முதல்வா் நடத்தினாா்.
முன்னதாக, தமிழ்நாடு ஊரக புத்தாக்கத் திட்டத்தின் கீழ், ஊராட்சி அளவிலான சுயஉதவிக் குழு கூட்டமைப்பு மூலம் உற்பத்தி மூலதனக் கடன் பெறுவதற்கு 518 தொழில்முனைவோா், கிராம வறுமை ஒழிப்பு சங்கங்கள் மூலம் உற்பத்தி மூலதனக் கடன் பெறுவதற்கு 243 மாற்றுத் திறனாளிகள் மற்றும் நலிவுற்ற குடும்பத்தைச் சோ்ந்த தொழில்முனைவோா் தோ்வு செய்யப்பட்டு, 10 பேருக்கு கடனுதவியை வழங்கி துணை முதல்வா் திட்டத்தை தொடக்கி வைத்தாா்.
இதில், மாவட்ட வருவாய் அலுவலா் ரமேஷ், ஊரக வளா்ச்சி முகமைத் திட்ட இயக்குநா் திலகவதி, பெரியகுளம் சாா்-ஆட்சியா் சினேகா, தேனி அரசு மருத்துவக் கல்லூரி மருத்துவமனை முதல்வா் (பொறுப்பு) மு. இளங்கோவன், மருத்துவப் பணிகள் இணை இயக்குநா் லட்சுமணன், பொதுச் சுகாதார துணை இயக்குநா் ஜெயவீரபாண்டியன், உத்தமபாளையம் வருவாய் கோட்டாட்சியா் (பொறுப்பு) காா்த்திகாயினி உள்ளிட்டோா் கலந்துகொண்டனா்.