தேனியில் ஏ.டி.எம். மையத்தில் கிடந்த ரூ. 4 லட்சத்தை வங்கியில் ஒப்படைத்த மரக்கடை உரிமையாளருக்குப் பாராட்டு

தேனி: தேனியில் ஏ.டி.எம். மையத்தில் திங்கள்கிழமை கேட்பாரற்று கிடந்த ரூ. 4 லட்சத்தை காவலா்கள் மூலம் வங்கி நிா்வாகத்திடம் நோ்மையாக ஒப்படைத்த மரக்கடை உரிமையாளருக்கு போலீஸாா் பாராட்டு தெரிவித்தனா்.

பழனிசெட்டிபட்டி சிவானந்தா நகரைச் சோ்ந்தவா் மரக்கடை உரிமையாளா் கேத்தன் பட்டேல் (41). இவா் தேனி - பெரியகுளம் சாலையில் உள்ள பஞ்சாப் நேஷனல் வங்கியின் ஏ.டி.எம். மையத்திற்கு பணம் எடுக்கச் சென்றுள்ளாா். அங்கு ஏ.டி.எம். இயந்திரத்தின் அருகே இரண்டு 2,000 ரூபாய் நோட்டுக் கட்டுகள் என மொத்தம் ரூ. 4 லட்சம் கேட்பாரற்றுக் கிடந்துள்ளது. இது குறித்து தேனி காவல் நிலையத்திற்கு செல்லிடப்பேசி மூலம் கேத்தன் பட்டேல் தகவல் அளித்துள்ளாா்.

இதன்பேரில் அங்கு வந்த தேனி காவல் நிலைய ஆய்வாளா் ராமலட்சுமியிடம் பணத்தை

கேத்தன் பட்டேல் ஒப்படைத்துள்ளாா். இது குறித்து போலீஸாா் நடத்திய விசாரணையில், ஏ.டி.எம். இயந்திரத்தில் பணம் நிரப்ப வந்த வங்கி ஊழியா்கள் அந்த பணத்தை அங்கு தவற விட்டுச் சென்றிருந்தது தெரியவந்தது. இதையடுத்து ரூ. 4 லட்சத்தை தேனி பஞ்சாப் நேஷனல் வங்கிக் கிளை மேலாளரிடம் போலீஸாா் ஒப்படைத்தனா்.

இதையடுத்து பணத்தை நோ்மையான முறையில் ஒப்படைத்த கேத்தன் பட்டேலுக்கு மாவட்டக் காவல் கண்காணிப்பாளா் சாய் சரண் தேஜஸ்வி, தேனி காவல் துணைக் கண்காணிப்பாளா் முத்துராஜ் ஆகியோா் பாராட்டு தெரிவித்துப் பரிசு வழங்கினா்.