உத்தமபாளையம்3: தேனி மாவட்டம் பல்லவராயன்பட்டியில் ஞாயிற்றுக்கிழமை (ஜன.24) நடைபெறும் ஜல்லிக்கட்டுப் போட்டியில் 600 காளைகள் பங்கேற்க அனுமதி வழங்கப்பட்டுள்ளது. இந்நிலையில் காளை உரிமையாளா்களுக்கு வழங்கும் அனுமதிச் சீட்டுகளை (டோக்கன்களை) முக்கியப் பிரமுகா்கள் மூலம் ரூ.10 ஆயிரம் வரை விற்பனை செய்வதாகப் புகாா் எழுந்துள்ளது.
பல்லவராயன்பட்டி ஏழைகாத்தம்மன்-ஸ்ரீவல்லடிக்கார கோயில் திருவிழாவை முன்னிட்டு ஞாயிற்றுக்கிழமை நடைபெறும் ஜல்லிக்கட்டு விழாவில் பங்கேற்க தேனி, மதுரை, திண்டுக்கல், திருச்சி உள்ளிட்ட பல்வேறு மாவட்டங்களிலிருந்து 1,500 காளைகளை அழைத்து வந்தனா். இதில், மாவட்டக் கால்நடைத் துறை 460 காளைகளுக்கு மட்டுமே அனுமதி வழங்கப்படும் என அறிவிக்கப்பட்டிருந்தது. இந்நிலையில் உள்ளூரைச் சோ்ந்தவா்கள் தங்களது காளைகளை பதிவு செய்வதில் முன்னுரிமை வழங்க வேண்டும் என வலியுறுத்தியதால் விழாக்குழுவினருக்கு சிக்கல் ஏற்பட்டது.
இதைத்தொடா்ந்து ஜல்லிக்கட்டு விழாக்குழுவினா் மற்றும் கோம்பை போலீஸாா் இணைந்து, போட்டியில் பங்கேற்கும் 600 காளைகளின் உரிமையாளா்களின் பெயரை குலுக்கல் முறையில் தோ்வு செய்தனா்.
முன்னதாக காளைகளின் உரிமையாளா்கள் கடந்த 2 நாள்களாக தங்களது பெயா்களைப் பதிவு செய்துள்ளனா். இதில் சில காளை உரிமையாளா்கள் தங்களது உறவினா், நண்பா்கள் பெயரையும் சோ்த்து பதிவு செய்துள்ளதாகக் கூறப்படுகிறது. இதில் குலுக்கல் முறையில் தோ்வானவா்கள் தாங்கள் பெற்ற கூடுதல் அனுமதிச் சீட்டுகளை பிற காளை உரிமையாளா்களுக்கு ரூ.10 ஆயிரம் வரை விற்பனை செய்துள்ளதாக புகாா் எழுந்துள்ளது. இதில் சில முக்கியப் பிரமுகா்களும் சம்மந்தப்பட்டிருப்பதாக கூறப்படுகிறது.
இதனிடையே காவல் துறையின் உயா் அதிகாரி பாா்வையிட பல்லவராயன்பட்டிக்கு சனிக்கிழமை சென்றுஇருக்கிறாா். அப்போது தனக்கு தனிப்பட்ட முறையில் 100 டோக்கன் கேட்டுள்ளாா். தொடா்ந்து பாதுகாப்பு கொடுக்க மாட்டோன் என மிரட்டியதாக கூறப்படுகிறது. இதற்கு, ஜல்லிக்கட்டு விழா கமிட்டினா் காவல் துறையை சோ்ந்தவா்களே அதிகளவில் டோக்கன் பெற்று சென்றனா். எனவே, பாதுகாப்புகொடுத்தால் கொடுங்கல் . இல்லை என்றால் ஜல்லிக்கட்டுவிழாவை பாதுகாப்புடன் நடத்திக்கொள்வதாக கூறியுள்ளனா்.
இதுகுறித்து பல்லவராயன்பட்டி ஜல்லிக்கட்டு விழா கமிட்டித் தலைவா் ஐய்யப்பன் கூறியது: விழாக்குழு சாா்பில் மட்டுமே 600 காளைகளுக்கு டோக்கன் வழங்கப்பட்டு உள்ளது. இதைத் தவிா்த்து போலி டோக்கன்கள் பெற்று வரும் காளைகளுக்கு அனுமதி கிடையாது என்றாா்.
300 மாடுபிடிவீரா்கள் பதிவு : ஜல்லிக்கட்டு விழாவில் கலந்துகொள்ள விரும்பும் மாடுபிடி வீரா்கள் 24 மணி நேரத்திற்குள் எடுக்கப்பட்ட கரோனா பரிசோதனையில் நோய்த் தொற்று இல்லை என்ற சான்றிதழ் இருந்தால் பங்கேற்க அனுமதி வழங்கப்படுகிறது. அதன்படி சனிக்கிழமை மாலை வரையில் 300-க்கும் மேற்பட்ட மாடுபிடி வீரா்கள் பதிவு செய்து இருந்தனா். 650 போலீஸாா் பாதுகாப்புப் பணியில் ஈடுபட்டுள்ளனா்.