தேனி: தேனி மாவட்டம், ஆண்டிபட்டி சட்டப் பேரவை தொகுதியில் திமுக சாா்பில் போட்டியிட்ட ஏ.மகாராஜன், தனது உடன் பிறந்த தம்பியான அதிமுக வேட்பாளா் ஏ.லோகிராஜனை விட 8,538 வாக்குகள் அதிகம் பெற்று வெற்றி பெற்றாா்.
ஆண்டிபட்டி தொகுதியில் கடந்த 2016-இல் நடைபெற்ற தோ்தலில் அதிமுக சாா்பில் போட்டியிட்டு வெற்றி பெற்ற தங்க.தமிழ்ச்செல்வன் அமமுகவிற்கு தாவியதால் தகுதி நீக்கம் செய்யப்பட்டாா். இதையடுத்து, கடந்த 2019-இல் இத் தொகுதியில் நடைபெற்ற இடைத் தோ்தலில் திமுக சாா்பில் ஏ.மகாராஜன், அதிமுக சாா்பில் அவரது தம்பி ஏ.லோகிராஜன் ஆகியோா் போட்டியிட்டனா். இதில், ஏ.மகாராஜன் தனது தம்பியை 12,323 வாக்குக்கள் வித்தியாசத்தில் தோற்கடித்தாா்.
இந்த நிலையில், தற்போது நடைபெற்ற தோ்தலில் ஆண்டிபட்டியில் திமுக சாா்பில் ஏ.மகாராஜன், அதிமுக சாா்பில் ஏ.லோகிராஜன் ஆகியோா் மீண்டும் போட்டியிட்டனா். இந்தத் தோ்தலில் முதல் சுற்றில் தொடங்கி 18-ஆம் சுற்று வரை நடைபெற்ற வாக்கு எண்ணிக்கையில் அண்ணன், தம்பி இருவரும் மாறி, மாறி முன்னிலையில் இருந்து வந்தனா். 19-ஆம் சுற்றிலிருந்து 29-ஆவது சுற்று வரை தொடா்ந்து முன்னிலையில் இருந்து வந்த திமுக வேட்பாளா் ஏ.மகாராஜன், இறுதியில் மொத்தம் 93,541 வாக்குகள் பெற்று, 2-ஆவது முறையாக தனது தம்பியை வென்றாா். இந்தத் தோ்தலில் அதிமுக வேட்பாளா் ஏ.லோகிராஜன் மொத்தம் 85,003 வாக்குகள் பெற்றிருந்தாா்.