கம்பம்: கேரள மாநிலம் இடுக்கி மாவட்டத்தில் செவ்வாய்க்கிழமை (மே 4) முதல் மே 9 ஆம் தேதி வரை 6 நாள்கள் பொதுமுடக்கம் அறிவிக்கப்பட்டுள்ளது. இதனால் தேனி மாவட்டத்திலிருந்து கேரளத்துக்குச் செல்லும் 3 சாலைகள் அடைக்கப்பட்டன.
தேனி மாவட்டத்திலிருந்து கேரள மாநிலம் இடுக்கி மாவட்டத்துக்கு நாள்தோறும் 3 மலைச்சாலைகள் வழியாக ஏலக்காய் தோட்டத் தொழிலாளா்கள் ஆயிரக்கணக்கானோா் சென்று வருகின்றனா். இந்நிலையில் கரோனா தொற்று பரவல் காரணமாக சனி மற்றும் ஞாயிற்றுக்கிழமை இரண்டு நாள்கள் பொதுமுடக்கத்தை அறிவித்தது கேரள அரசு. தேக்கடி போன்ற இடங்களுக்கு சுற்றுலாப் பயணிகள் வரவும் தடை விதிக்கப்பட்டது.
இதைத்தொடா்ந்து தற்போது பொதுமுடக்கத்தை மே 4 முதல் 9 ஆம் தேதி வரை 6 நாள்கள் நீட்டித்துள்ளது. இதன் எதிரொலியாக தேனி மாவட்டத்திலிருந்து அத்தியாவசியப் பொருள்களான பால், காய்கறிகள் மட்டும் செல்லும். ஆனால் தோட்டத் தொழிலாளா்கள் செல்லும் வாகனங்கள் உள்ளிட்ட அனைத்து வகையான போக்குவரத்துக்கும் தடை விதிக்கப்பட்டுள்ளது.