தேனி: பெரியகுளம், உத்தமபாளையம் உள்ளிட்ட பகுதிகளில் பெண்களிடம் நகை பறிப்பில் ஈடுபட்ட மதுரை, சென்னையைச் சோ்ந்த 2 இளைஞா்களை, தனிப்படை போலீஸாா் வியாழக்கிழமை கைது செய்தனா்.
பெரியகுளம் அருகே வரதராஜ நகரைச் சோ்ந்த வசந்தசெல்வி, உத்தமபாளையம் பி.டி.ஆா். காலனியை சோ்ந்த சந்திரா ஆகியோரிடமிருந்து மொத்தம் 6 பவுன் நகைகளை, கடந்த பிப்ரவரி 22-ஆம் தேதி மா்ம நபா்கள் இருவா் பறித்துச் சென்றுள்ளனா். இதன் மீதான புகாா்களின்பேரில் போலீஸாா் வழக்குப் பதிந்து, மாவட்டக் காவல் கண்காணிப்பாளா் பிரவீண் உமேஷ் டோங்கரே உத்தரவின்பேரில் காவல் சாா்பு-ஆய்வாளா்கள் சதீஷ், திவான் மைதீன் ஆகியோா் தலைமையில் தனிப்படை அமைத்து விசாரித்து வந்தனா்.
இதில், 2 நகை பறிப்புச் சம்பவங்களிலும் ஈடுபட்டதாக, மதுரையைச் சோ்ந்த பாண்டியன் (28) மற்றும் சென்னை தாம்பரத்தைச் சோ்ந்த லோகநாதன் (28) ஆகியோரை தனிப்படை போலீஸாா் கைது செய்து, இவா்களிடமிருந்து 6 பவுன் நகைகளை மீட்டனா்.