வீரபாண்டியில் மின்சாரம் பாய்ந்து ராட்டினத் தொழிலாளி பலி

தேனி: வீரபாண்டியில் சித்திரை திருவிழாவையொட்டி, ராட்டினம் சீரமைக்கும் பணியில் ஈடுபட்டிருந்த தொழிலாளி புதன்கிழமை, மின்சாரம் பாய்ந்து உயிரிழந்தாா்.

தேனி மாவட்டம் வீரபாண்டியில், கெளமாரியம்மன் கோயில் சித்திரை திருவிழாவை முன்னிட்டு ராட்டினத் திடலில் 28-க்கும் மேற்பட்ட ராட்டினங்கள் அமைக்கப்பட்டுள்ளன. இதில், மேலூரைச் சோ்ந்த மோகன் என்பவரது ‘டிஸ்கோ பிரேக்’ என்ற ராட்டினத்தின் அருகே உயா்கோபுர மின் விளக்கு கம்பம் சாய்ந்த நிலையில் இருந்துள்ளது. இதை சீரமைக்கும் பணியில் உப்பாா்பட்டியைச் சோ்ந்த தொழிலாளி முத்துக்குமாா் (32) ஈடுபட்டுள்ளாா்.

அப்போது, உயா்கோபுர மின் விளக்கு கம்பத்தில் மின் கசிவு ஏற்பட்டு முத்துக்குமாரின் உடலில் மின்சாரம் பாய்ந்தது. இதில் தூக்கி வீசப்பட்ட அவா், ஆபத்தான நிலையில் வீரபாண்டி அரசு ஆரம்ப சுகாதார நிலையத்திற்கு கொண்டு செல்லும் வழியில் உயிரிழந்தாா். முத்துக்குமாருக்கு சுமித்திரா என்ற மனைவி மற்றும் 3 குழந்தைகள் உள்ளனா்.

வீரபாண்டி சித்திரை திருவிழாவின் முக்கிய நிகழ்ச்சிகள் தொடங்கிய 2-ஆம் நாளன்று ராட்டினத் திடலில் மின்சாரம் பாய்ந்து தொழிலாளி உயிரிழந்த சம்பவம் பொதுமக்கள் மத்தியில் அதிா்ச்சியை ஏற்படுத்தியுள்ளது.

ராட்டினங்கள் இயக்கம் நிறுத்தம்:

மின்சாரம் பாய்ந்து தொழிலாளி உயிரிழந்த நிலையில், அனைத்து ராட்டினங்களின் இயக்கமும் நிறுத்தி வைக்கப்பட்டது. ராட்டினத் திடலில் மாவட்டக் காவல் கண்காணிப்பாளா் பிரவீன் உமேஷ் டோங்கரே பாா்வையிட்டு ஆய்வு செய்தாா்.

மின்வாரியம் விளக்கம்:

ராட்டினம் சீரமைப்புப் பணியிலிருந்த முத்துக்குமாா், ஜெனரேட்டரிலிருந்து மின்சாரம் பாய்ந்து உயிரிழந்ததாகவும், இதற்கு ராட்டின ஒப்பந்ததாரா் தான் பொறுப்பு என்றும், மின்வாரியத்திற்கும் இதற்கும் எந்த தொடா்பும் இல்லையென்றும் தேனி மின் வாரிய உதவி செயற் பொறியாளா் சரவணன் தெரிவித்தாா்.

புகைப்படக் கண்காட்சி திறப்பு ஒத்திவைப்பு:

வீரபாண்டியில் சித்திரை திருவிழாவை முன்னிட்டு செய்தி மக்கள் தொடா்பு துறை சாா்பில் அரசு சாதனை விளக்க புகைப்பட கண்காட்சி அமைக்கப்பட்டுள்ளது. இந்த கண்காட்சியை மாவட்ட ஆட்சியா் க.வீ.முரளீதரன் புதன்கிழமை திறந்து வைப்பதாக அறிவிக்கப்பட்டிருந்தது. வீரபாண்டியில் ராட்டினத் தொழிலாளி மின்சாரம் பாய்ந்து உயிரிழந்த சம்பவத்தையடுத்து, புகைப்பட கண்காட்சி திறப்பு ஒத்தி வைக்கப்பட்டது.