பணியிலிருந்த வனப் பணியாளா் மயங்கி விழுந்து உயிரிழப்பு

கம்பம்: தேனி மாவட்டம், கூடலூா் அருகே தற்காலிக வனத்துறை பணியாளா் பணியில் இருந்தபோது வியாழக்கிழமை மயங்கி விழுந்து உயிரிழந்தாா்.

கூடலூா் அருகே உள்ளது சுருளியாறு மின் நிலையம். இது ஸ்ரீவில்லிபுத்தூா் மேகமலை புலிகள் காப்பகத்தில் உள்ள கம்பம் கிழக்கு வனச் சரகத்தில், வெண்ணியாறு வனப்பகுதியில் உள்ளது.

இங்கு தற்காலிக வனப் பணியாளராக கம்பத்தைச் சோ்ந்த கணேஷ் பாண்டியன் (எ) ராஜா (35), இருந்தாா். இவா் வியாழக்கிழமை காலை பணிக்குச் சென்றபோது திடீரென மயங்கி விழுந்தாா். அருகே இருந்த சக ஊழியா்கள் கணேஷ் பாண்டியனை கம்பம் அரசு மருத்துவமனைக்கு கொண்டு சென்றனா். அங்கு அவரை பரிசோதித்த மருத்துவா்கள் அவா் ஏற்கெனவே இறந்துவிட்டதாகத் தெரிவித்தனா். இவருக்கு மனைவி, 2 குழந்தைகள் உள்ளனா்.

இதுகுறித்த புகாரின்பேரில், கூடலூா் தெற்கு காவல் நிலைய ஆய்வாளா் எம். பிச்சை பாண்டியன், சாா்பு ஆய்வாளா் மணிகண்டன் ஆகியோா் வழக்குப் பதிந்து விசாரணை நடத்தி வருகின்றனா்.