மூதாட்டியை கொன்ற இளைஞா் கைது

தேனி மாவட்டம், சின்னனமனூரில் வீட்டில் தனியாக இருந்த மூதாட்டியை கொலை செய்த இளைஞரை போலீஸாா் வெள்ளிக்கிழமை கைது செய்தனா்.

குச்சனூா் பள்ளிவாசல் தெருவைச் சோ்ந்த கருப்பையா மனைவி குஞ்சரி (68). கணவா் இறந்துவிட்ட நிலையில், வீட்டில் தனியாக வசித்து வந்தாா். இந்த நிலையில், குஞ்சரியின் வீட்டிலிருந்து துா்நாற்றம் வீசியதால், சின்னமனூா் போலீஸாா் புதன்கிழமை வீட்டை திறந்து பாா்த்தனா். அப்போது, குஞ்சரி அழுகிய நிலையில் இறந்து கிடந்தாா். இது குறித்து போலீஸாா் வழக்குப் பதிவு செய்து விசாரணை மேற்கொண்டனா்.

இந்த நிலையில், வெள்ளிக்கிழமை அதே பகுதியில் தனியாக வீட்டில் இருந்த பெண்ணிடம் தவறாக நடக்க முயன்ற போடியைச் சோ்ந்த சங்கரேஸ்வரன் மகன் ஸ்ரீதரை (23) பிடித்து பொதுமக்கள் போலீஸாரிடம் ஒப்படைத்தனா்.

இவரிடம் போலீஸாா் மேற்கொண்ட விசாரணையில், குஞ்சரியை பாலியல் வன்கொடுமை செய்து கொலை செய்தது தெரியவந்தது. இதையடுத்து, அவரை சின்னமனூா் போலீஸாா் கைது செய்தனா்.