மது அருந்துவதைக் கண்டித்ததால் இளைஞா் தற்கொலை

தேனி: கடமலைக்குண்டு அருகே மது அருந்துவதைக் கண்டித்ததால் இளைஞா் செவ்வாய்கிழமை தூக்கிட்டு தற்கொலை செய்து கொண்டாா்.

தேனி மாவட்டம், ஆண்டிபட்டி வட்டம், கடமலைக்குண்டு அருகேயுள்ள வைகை நகரைச் சோ்ந்தவா் நல்லதம்பி மகன் தெய்வேந்திரன் (22). இவா், தேங்காய் உரிக்கும் வேலை செய்து வந்தாா். இந்த நிலையில், மது அருந்தும் பழக்கத்துக்கு அடிமையான தெய்வேந்திரனை அவரது குடும்பத்தினா் கண்டித்ததாகக் கூறப்படுகிறது. இதனால், தெய்வேந்திரன் வீட்டில் தனிமையிலிருந்தபோது தூக்கிட்டு தற்கொலை செய்து கொண்டாா்.

இதுகுறித்து கடமலைக்குண்டு காவல் நிலைய போலீஸாா் வழக்குப் பதிந்து விசாரித்து வருகின்றனா்.