பிளஸ் 2 மாணவியை கடத்தப் போவதாக மிரட்டல்: 3 பேர் மீது வழக்கு

அருப்புக்கோட்டையில் பிளஸ் 2 மாணவியைத் திருமணம் செய்து வைக்க மறுத்தால் கடத்துவோம் என மிரட்டல் விடுத்த 3 பேர் மீது போலீஸில் வழக்குப் பதிவு செய்யப்பட்டுள்ளது.

 அருப்புக்கோட்டை புளியம்பட்டி பகுதியில் வசிக்கும் சாமிநாதனின் மூத்த மகன் ராஜூ. இவர் சென்னையில் உள்ள தனியார் நிறுவனத்தில் பணியாற்றி வருகிறார். இவருக்கு, அருப்புக்கோட்டை மீனாட்சிபுரம் பகுதியில் வசிக்கும் தங்களது உறவினர் பி.முத்துப்பாண்டியின் பிளஸ் 2 படிக்கும் மகளை திருமணம் செய்து வைக்க சாமிநாதன் உள்ளிட்டவர்கள் வலியுறுத்தினராம்.

மேலும் பெண் தர மறுத்தால் மாணவியை கடத்துவோம் என அவர்கள் மிரட்டல் விடுத்தனராம். இதுகுறித்து அருப்புக்கோட்டை மகளிர் காவல் நிலையத்தில் முத்துப்பாண்டி அளித்த புகாரின் பேரில் காவல் ஆய்வாளர் அன்புமதி, சாமிநாதன், அவரது மகன்கள் ராஜூ, முனீஸ்வரன் ஆகிய 3 பேர் மீதும் வழக்குப் பதிந்து விசாரித்து வருகிறார்.