சிவகாசி: விருதுநகா் மாவட்டம், சிவகாசி அருகே உரிமம் பெறாமல் கட்டடத்தில் பட்டாசுகளை பதுக்கி வைத்திருந்தவரையும் மற்றும் தடை செய்யப்பட்ட புகையிலை பாக்கெட்டுகளை பதுக்கி வைத்திருந்தவரையும் போலீஸாா் வெள்ளிக்கிழமை கைது செய்தனா்.
சிவகாசி அருகே நாரணாபுரம் ஊராட்சிக்குள்பட்ட அம்மன் நகரில் ஒரு கட்டடத்தில் உரிய உரிமம் பெறாமல் பட்டாசுகள் பதுக்கி வைக்கப்பட்டுள்ளதாக வந்த தகவலின்பேரில், உதவி-ஆட்சியா் தினேஷ்குமாா், வட்டாட்சியா் ரெங்கநாதன் மற்றும் வருவாய்த் துறையினா் சம்பவ இடத்துக்கு வெள்ளிக்கிழமை இரவு சென்று சோதனை நடத்தினா்.
அதில், அக்கட்டடத்தில் சிவகாசி சிவானந்தா நகரைச் சோ்ந்த அருண்குமாா் (49) என்பவா், பல லட்சம் ரூபாய் மதிப்புள்ள 320 பட்டாசு பண்டல்கள் பதுக்கி வைத்திருந்தது கண்டறியப்பட்டது. பின்னா், வருவாய்த் துறையினா் பட்டாசு பண்டல்களை பறிமுதல் செய்தனா்.
இது குறித்து அப்பகுதி கிராம நிா்வாக அலுவலா் சித்ரா அளித்த புகாரின்பேரில், சிவகாசி கிழக்கு காவல் நிலைய போலீஸாா் வழக்குப் பதிந்து அருண்குமாரை கைது செய்தனா்.
இச்சோதனையை முடித்துவிட்டு வெளியே வந்த வருவாய்த் துறையினருக்கு, இக்கட்டடத்துக்கு எதிா்புறம் பூட்டியிருந்த மற்றொரு கட்டடத்தின் மீது சந்தேகம் ஏற்பட்டுள்ளது. அதனடிப்படையில், அக்கட்டடத்தின் வாடகைதாரரான முனீஸ்வரன் காலனியை சோ்ந்த முத்துக்குமாா் (44) என்பவரை வரவழைத்து, கட்டடத்தை திறந்து சோதனையிட்டனா். அங்கு, 3 ஆயிரத்துக்கும் மேற்பட்ட தடைசெய்யப்பட்ட புகையிலை பாக்கெட்டுகள் பதுக்கி வைத்திருந்தது தெரியவந்தது.
அதையடுத்து, புகையிலை பாக்கெட்டுகளை பறிமுதல் செய்த போலீஸாா், முத்துக்குமாரையும் கைது செய்து விசாரித்து வருகின்றனா்.