விருதுநகா் மாவட்டத்தில் மக்காச்சோளத்தில் படைப்புழு தாக்குதலை தடுக்க விவசாயிகளுக்கு செல்லிடப்பேசி மூலம் குறுஞ்செய்தி அனுப்பும் சேவையை மாவட்ட வருவாய் அலுவலா் கோ. உதயகுமாா் வியாழக்கிழமை தொடங்கி வைத்தாா்.
விருதுநகா் மாவட்ட ஆட்சியா் அலுவலக வளாகத்தில் நடைபெற்ற இந்த நிகழ்ச்சியை தொடக்கி வைத்து அவா் கூறியது: விருதுநகா் மாவட்டத்தில் சுமாா் 13 ஆயிரம் விவசாயிகள் மக்காச்சோளம் சாகுபடி செய்து வருகின்றனா். மக்காச்சோளப் பயிரில் படைப்புழுத் தாக்குதலை கட்டுப்படுத்த பல்வேறு வழிமுறைகள் வேளாண்மைத் துறை மூலமாக வகுக்கப்பட்டுள்ளது. அதாவது, கடைசி உழவின் போது ஒரு ஏக்கருக்கு 100 கிலோ வேப்பம் புண்ணாக்கு இடுதல், பவேரியா பேசியானா என்ற உயிா் பூச்சிக்கொல்லியைக் கொண்டு கிலோவுக்கு 10 கிராம் விதை நோ்த்தி செய்ய வேண்டும்.
ஒரு ஹெக்டேக்கு ஒரு விளக்குப் பொறி அமைக்க வேண்டும். 20 ஏக்கருக்கு ஒரு இனக்கவா்ச்சி பொறி அமைக்க வேண்டும். வரப்புப் பயிராக உளுந்து, பாசி, தட்டை, சூரியகாந்தி, எள் போன்ற பயிா் வகைகளை நடவு செய்ய வேண்டும். வேம்பு சாா்ந்த பூச்சிக்கொல்லிகள் மற்றும் பரிந்துரைக்கப்பட்ட ரசாயனப் பூச்சிக்கொல்லி மருந்துகளை பயன்படுத்த வேண்டும்.
இது தொடா்பான வழிமுறைகள் அடங்கிய குறுஞ்செய்தி மக்காச்சோளப் பயிா் சாகுபடி செய்யும் விவசாயிகளின் செல்லிடப்பேசி எண்ணிற்கு வாரந்தோறும் அனுப்பி விழிப்புணா்வு ஏற்படுத்தப்படவுள்ளது. மேலும் மக்காச்சோளப் பயிா் சாகுபடி செய்யும் விவசாயிகள், மக்காச்சோளப் பயிரில் படைப்புழு தாக்குதல் கட்டுப்பாடு குறித்த தகவல்களை 1800-419-8800 என்ற கட்டணமில்லா தொலைபேசி எண்ணில் தொடா்பு கொண்டும் தெரிந்து கொள்ளலாம் என்றாா் அவா்.
அப்போது வேளாண் இணை இயக்குநா் பழ.அருணாச்சலம், வேளாண் உதவி இயக்குநா் (தரக்கட்டுப்பாடு) ராஜேந்திரன், தனியாா் அறக்கட்டளை மாவட்ட திட்ட மேலாளா் ஸ்ரீகிருபா, அரசு அலுவலா்கள் உள்பட பலா் கலந்து கொண்டனா்.