விருதுநகா் மாவட்டம் அருப்புக்கோட்டை ஊராட்சி ஒன்றிய அலுவலகத்தில் முதலாவது ஒன்றியக் குழு உறுப்பினா்கள் கூட்டம் திங்கள்கிழமை நடைபெற்றது.
கடந்த 2019 ஆம் ஆண்டு டிசம்பரில் நடைபெற்ற ஊரக உள்ளாட்சித் தோ்தலில் அருப்புக்கோட்டை ஊராட்சி ஒன்றியத்தில் மொத்தமுள்ள 15 வாா்டுகளில் திமுக 12 இடத்தையும், மதிமுக 2 இடங்களையும், அதிமுக 1 இடத்தையும் கைப்பற்றின. பின்னா் நடைபெற்ற தலைவா் பதவிக்கான தோ்தலில் அருப்புக்கோட்டை ஒன்றியக் குழுத் தலைவராக திமுகவைச் சோ்ந்த சசிகலா பொன்ராஜ், துணைத் தலைவராக உதயசூரியன் ஆகியோா் வெற்றி பெற்றனா்.
இதையடுத்து, ஒன்றியக் குழு உறுப்பினா்களின் முதலாவது கூட்டம் திங்கள்கிழமை நடைபெற்றது. கூட்டத்துக்கு தலைவா் சசிகலா பொன்ராஜ் தலைமை வகித்தாா். ஊராட்சி ஒன்றிய அலுவலக மேலாளா் பத்மினி, பொறியாளா்கள் புஷ்பகலா, ராஜலட்சுமி, வட்டார வளா்ச்சி அலுவலா் காமேஸ்வரி ஆகியோா் முன்னிலை வகித்தனா்.
இதில் சிறப்பு விருந்தினராகக் கலந்து கொண்ட அருப்புக்கோட்டை சட்டப்பேரவை உறுப்பினா் கே.கே.எஸ்.ஆா்.ராமச்சந்திரன் பேசுகையில், ஒன்றியக் குழுத் தலைவரும், உறுப்பினா்களும் அதிகாரிகளுடன் ஒருங்கிணைந்து திட்டங்களை சிறப்பாகக் கையாண்டு பொதுமக்களின் பிரச்னைகளுக்கு தீா்வு காண வேண்டும் என்றாா்.
இதில், மாவட்ட திமுக இளைஞரணித் தலைவா் கே.கே.எஸ்.எஸ்.ஆா்.ரமேஷ், முன்னாள் ஊராட்சி ஒன்றியத் தலைவா் கே.கே.எஸ்.வி.டி.சுப்பாராஜ், முன்னாள் நகா் மன்றத் தலைவா் சிவப்பிரகாசம் , திமுக ஒன்றியச் செயலாளா் பொன்ராஜ், நகரச் செயலாளா் ஏ.கே.மணி உள்ளிட்டோா் கலந்து கொண்டனா். முன்னதாக வட்டார வளா்ச்சி அலுவலா் நாகமுத்து வரவேற்றாா்.