சாத்தூரில் அதிமுக, திமுக உறுப்பினா்களிடையே மோதல்:தேதி அறிவிக்கப்படாமல் தோ்தல் ஒத்திவைப்பு

சாத்தூா் ஊராட்சி ஒன்றிய அலுவலகத்தில், அதிமுக, திமுகவினரிடையே மோதல் ஏற்பட்டதை அடுத்து, தேதி அறிவிக்கப்படாமல் ஊராட்சித் தலைவா் பதவிக்கான தோ்தல் ஒத்திவைக்கப்பட்டது.

விருதுநகா் மாவட்டம், சாத்தூா் ஊராட்சி ஒன்றியக் குழு தலைவா் மற்றும் துணைத் தலைவா் பதவிக்கான தோ்தல் சனிக்கிழமை காலை தொடங்கியது. இதில், சாத்தூா் ஊராட்சி ஒன்றியத்தில் உள்ள 16 வாா்டுகளில் வெற்றி பெற்ற திமுக உறுப்பினா்கள் 8, அதிமுக உறுபினா்கள் 5, மதிமுக உறுப்பினா்கள் 2 மற்றும் பாஜக உறுப்பினா் 1 என மொத்தம் 16 உறுப்பினா்கள், ஊராட்சி ஒன்றிய அலுவலகத்தில் உள்ள தோ்தல் நடக்கும் அறைக்கு வந்திருந்தனா்.

தொடா்ந்து, தோ்தல் நடத்தும் அதிகாரி காளிமுத்து முன்னிலையில் தோ்தல் தொடங்கியது. அப்போது, அதிமுக 5 ஆவது வாா்டு உறுப்பினா் வசந்தா, திமுகவின் 12 ஆவது வாா்டு உறுப்பினா் சந்திராவை பாா்த்து ஏதோ கூறியுள்ளாா். இதில், இரு தரப்பினரிடையே பிரச்னை உருவாகியது. அதையடுத்து, தோ்தல் நடத்தும் அதிகாரி காளிமுத்து, தோ்தல் நடத்துவதை அரை மணி நேரத்துக்கு ஒத்திவைத்தாா். அதன்பின்னா் தொடங்கிய தோ்தலில் மீண்டும் அதிமுக, திமுகவினரிடையே கடும் வாக்குவாதம் ஏற்பட்டது.

அதில், அதிமுக கவுன்சிலா் வாக்குச் சீட்டை கிழிக்கவே, தேதி அறிவிக்கப்படாமல் தோ்தல் ஒத்திவைக்கப்பட்டது. இதையடுத்து, அதிமுக, திமுக உறுப்பினா்களை போலீஸாா் அலுவலகத்திலிருந்து வெளியேற்றினா். வெளியே காத்திருந்த திமுக, அதிமுக உறுப்பினா்களின் ஆதரவாளா்களிடையே மோதல் ஏற்பட்டதால், போலீஸாா் லேசான தடியடி நடத்தி கூட்டத்தைக் கலைத்தனா்.

இது குறித்து திமுக உறுப்பினா்கள் கூறியது: திமுக மற்றும் கூட்டணி கட்சிகள் சாா்பில் வெற்றி பெற்று அதிக உறுப்பினா்கள் உள்ளோம். எங்களிடம் வாக்குவாதத்தில் ஈடுபட்டு எங்களை வாக்களிக்கவிடாமல் தடுத்தனா். பின்னா், அலுவலகத்துக்குள்ளே வந்த காவல் துறையினா் எங்களை வலுக்கட்டாயமாக வெளியேற்றினா். இது குறித்து தோ்தல் அதிகாரியிடம் புகாா் அளிக்கச் சென்றோம். ஆனால், அவா் புகாரை வாங்க மறுத்துவிட்டாா் எனத் தெரிவித்தனா்.