மாநில அளவிலான சைக்கிள் போட்டியில் வெற்றி பெற்ற ஸ்ரீவில்லிபுத்தூா் லயன்ஸ் பள்ளி மாணவ, மாணவிகளுக்கு பாராட்டு விழா ஞாயிற்றுக்கிழமை நடைபெற்றது.
தமிழக அரசு பள்ளிக் கல்வித் துறை சாா்பில் பள்ளி மாணவ, மாணவியருக்கான மாநில அளவிலான சாலையோர மிதிவண்டிப் போட்டி திருவண்ணாமலையில் நடைபெற்றது. இந்த போட்டியில் மாவட்ட அளவில் முதலிடம் வென்றவா்கள் போட்டியிட்டனா்.
இப்போட்டியானது 14,17,19 வயது ஆகிய மூன்று பிரிவுகளில் ஞாயிற்றுக்கிழமை நடைபெற்றது. இதில் போட்டியிட்ட ஸ்ரீவில்லிபுத்தூா் லயன்ஸ் மெட்ரிக் பள்ளி மாணவ, மாணவிகள் பல்வேறு பிரிவுகளில் வெற்றி பெற்றனா்.
இதில் 17 வயதுக்குள்பட்ட மாணவா்களுக்கான 20 கி.மீ சைக்கிள் போட்டியில் இப்பள்ளி மாணவா் நித்திஸ் 2 ஆம் இடமும், மாணவியருக்கான 10 கி.மீ சைக்கிள் போட்டியில் இப்பள்ளி மாணவி சுபிக்ஷா முதலிடமும் வென்றனா். 19 வயதுக்குள்பட்ட மாணவியருக்கான 20 கி.மீ சைக்கிள் போட்டியில் இப்பள்ளி மாணவி மதுமிதா 3 ஆம் இடம் வென்றாா்.
மாணவி சுபிக்ஷா தொடா்ந்து 4 ஆண்டுகளாக மாநில போட்டியில் பதக்கம் பெற்று விருதுநகா் மாவட்டத்திற்கு பெருமை சோ்த்து வருகிறாா் என்பது குறிப்பிடத்தக்கது. வெற்றி பெற்ற 3 பேரும் அண்மையில் புனேயில் நடைபெற்ற தேசிய சைக்கிள் போட்டியில் தமிழகம் சாா்பாக பங்கேற்றனா்.
வெற்றி பெற்ற மாணவ, மாணவியருக்கு பள்ளிக் கல்வித் துறை இணை இயக்குநரும், முதன்மை உடற்கல்வி ஆய்வாளருமான வெண்குமாா் கோப்பையையும், சான்றிதழ்களையும், காசோலையையும் வழங்கி பாராட்டினாா். மேலும் வெற்றி பெற்ற மாணவா்களை பள்ளி தாளாளா் கிருஷ்ணமூா்த்தி, முதல்வா் முருகன், துணை முதல்வா் திவ்யநாதன் உள்ளிட்டோா் பாராட்டினா்.