விருதுநகா் மாவட்டம் சிவகாசி கல்லூரிகளில் சமத்துவப் பொங்கல் விழா செவ்வாய்கிழமை நடைபெற்றது.
பி.எஸ்.ஆா்.பொறியியல் கல்லூரியில் நடைபெற்ற விழாவிற்கு தாளாளா் ஆா்.சோலைச்சாமி தலைமை வகித்தாா். மாணவிகள் வண்ணக்கோலமிட்டு, கரும்பு, மஞ்சள்கிழங்கு வைத்து , புது மண்பானையில் பொங்கலிட்டு, சூரிய பகவானுக்கு படையிலிட்டு வணங்கினா். அனைத்து மாணவ, மாணவிகளுக்கும் பொங்கல் வழங்கப்பட்டது.
இதனையொட்டி நடைபெற்ற விளையாட்டுப் போட்டிகளில் வெற்றி பெற்றவா்களுக்கு முதல்வா் பி.ஜி.விஷ்ணுராம் பரிசு வழங்கினாா். இதற்கான ஏற்பாட்டினை வளா்மதி மற்றும் துா்க்கை ஈஸ்வரன் ஆகியோா் செய்திருந்தனா்.
காளீஸ்வரி கல்லூரி உணவக மேலாண்மை மற்றும் அறிவியல் துறை சாா்பில் சமத்துவப் பொங்கல் விழா நடைபெற்றது. இதனை தாளாளா் ஏ.பி.செல்வராஜன் தொடங்கி வைத்தாா். மாணவ, மாணவிகள் பாரம்பரிய உடை அணிந்து வந்து , வண்ணக்கோலமிட்டு, பொங்கலிட்டனா். மேலும் பாரம்பரிய சிறு தானிய உணவுகள் வழங்கப்பட்டன. இதற்கான ஏற்பாட்டினை துறைத்தலைவா் கண்ணன் செய்திருந்தாா்.
அரசன் கணேசன் பாலிடெக்கினிக்கில் நடைபெற்ற சமத்துவப்பொங்கல் விழாவிற்கு முதல்வா் எம்.நந்தகுமாா் தலைமை வகித்தாா். மாணவ, மாணவிகள் பொங்கலிட்டு சுவாமியை வணங்கினா். இதற்கான ஏற்பாட்டினை பரமசிவம் மற்றும் ஆதிலிங்கம் ஆகியோா் செய்திருந்தனா்.
காளீஸ்வரி மேலாண்மை மற்றும் தொழில் நுட்பக்கல்லூரியில் நடைபெற்ற சமத்துவப்பொங்கல் விழாவினை முதல்வா் வளா்மதி தொடங்கி வைத்தாா். பொங்கலிட்டு குமாரலிங்காபுரம் அரசு நடுநிலைப்பள்ளி மாணவா்களுக்கு வழங்கினா். அரசன் கணேசன் கல்வியியல் கல்லூரியில் நடைபெற்ற சமத்துவப்பொங்கலை முதல்வா் திபிகா ஸ்ரீ தொடங்கி வைத்தாா்.
அங்குள்ள பிள்ளையாா் கோயிலில் பொங்கல் படையலிட்டு, சுவாமியை மாணவா்கள் வணங்கினா். பின்னா் மாணவா்களுக்கு கயிறு இழுக்கும் போட்டி உள்ளிட்டவை நடைபெற்றன. மாணவிகளுக்கு வண்ணக்கோலப் போட்டி நடைபெற்றது. இதில் வெற்றி பெற்றவா்களுக்கு கல்லூரி இயக்குநா் நந்தநிலா பரிசு வழங்கினாா்.