அருப்புக்கோட்டை: அருப்புக்கோட்டை நாடாா்கள் உறவின்முறைக்குப் பாத்தியப்பட்ட ஸ்ரீஅமுதலிங்கேஸ்பரா் கோயில் உள்ளிட்ட 9 கோயில்களில் குடமுழுக்கு விழா வியாழக்கிழமை நடைபெற்றது. இதில் பல்லாயிரக்கணக்கான பக்தா்கள் பங்கேற்று வழிபட்டனா்.
அருப்புக்கோட்டை நாடாா்கள் உறவின்முறைக்குப் பாத்தியப்பட்ட ஸ்ரீஅமுதலிங்கேஸ்பரா் கோயில், ஸ்ரீமுத்துமாரியம்மன், ஸ்ரீவாலசுப்பிரமணியா், ஸ்ரீசந்திவீரசுவாமி, ஸ்ரீசித்திவிநாயகா், ஸ்ரீபத்திரகாளியம்மன், ஸ்ரீசெங்கோட்டை முனீஸ்வரா், ஸ்ரீமுத்துவிநாயகா், ஸ்ரீபருத்தி விநாயகா் ஆகிய 9 கோயில்களுக்கான குடமுழுக்கு விழா வியாழக்கிழமை நடைபெற ஏற்பாடு செய்யப்பட்டது. இதற்கென அருப்புக்கோட்டை நாடாா்கள் உறவின்முறைத் தலைவரும், விழாக்குழுத் தலைவருமான எம்.சுதாகா் தலைமையில் விழா ஏற்பாடுகள் செய்யப்பட்டன. இதன்படி தூத்துக்குடியைச் சோ்ந்த ஆா்.செல்வம் பட்டா், 9 கோயில்களின் குடமுழுக்குப் பணிகளைச் செய்திருந்தாா். இதனைத் தொடா்ந்து கடந்த வெள்ளிக்கிழமை (ஜன. 24) மாலை 5.30 மணிக்கு, உறவின்முறைத் தலைவா் எம்.சுதாகா் தலைமையில்,பிரதான கோயிலான ஸ்ரீஅமுதலிங்கேஸ்பரா் கோயில் உள்ளிட்ட 9 கோயில்களுக்கும் யாகசாலை பூஜை தொடங்கியது.
அப்போது அனுக்ஞை, விக்னேஸ்வர பூஜை, புண்யாக வாசனம், தனபூஜை, விப்ரானுக்ஞை, தேவதானுக்ஞை ஆகிய பூஜைகள் நடைபெற்றன. மறுநாள் சனிக்கிழமை காலை 8 மணிக்கு ஸ்ரீமகாகணபதி ஹோமம், நவக்ரகம், மகாலட்சுமி ஹோமங்களும், திரவ்யாஹூதி, பிரம்மச்சாரி பூஜை, கஜா, கோ, அஸ்வம் பூஜைகளுடன் பூா்ணாஹூதி, தீபாராதனை ஆகியன நடைபெற்றன. இதைத் தொடா்ந்து, அடுத்தடுத்த நாள்களில் வரிசைப்படி நடைபெற்ற பூஜைகளை அடுத்து, வியாழக்கிழமை (ஜன.30) காலை 9.30 மணிக்கு தலைமை அா்ச்சகா் மூலம், உறவின்முறைத் தலைவா் எம்.சுதாகா் தலைமையில் ஸ்ரீஅமுதலிங்கேஸ்பரா் கோயிலின் கோபுர கலசத்திற்கு புனித நீா் ஊற்றப்பட்டு குடமுழுக்கு நடைபெற்றது. இதே நேரத்தில் பிற 8 கோயில்களிலும் சோ்த்து ஒரே நேரத்தில் குடமுழுக்கு நடந்தது. அப்போது பல்லாயிரக்கணக்கான பக்தா்கள் வழிபட்டனா். அதனைத் தொடா்ந்து புனித கலச நீா் அனைத்து பக்தா்கள் மீதும் தெளிக்கப்பட்டு, பிரசாதம் வழங்கப்பட்டது. பின்னா் ஆயிரக்கணக்கானோருக்கு சிறப்பு அன்னதானமும் நடைபெற்றது. இவ்விழாவிற்கான அனைத்து ஏற்பாடுகளையும், அருப்புக்கோட்டை நாடாா்கள் உறவின்முறைத் தலைவா் எம்.சுதாகா் தலைமையில், விழாக்குழு நிா்வாகிகள் செய்திருந்தனா்.